Президентнинг 2026 йил 2 октябрдаги ПҚ–358-сон қарорига мувофиқ, 14 та педагогика олийгоҳи ва Ихтисослаштирилган таълим муассасалари агентлиги тизимидаги 3 та олий таълим муассасасининг бошқарув тизими ўзгартирилди.
Шунингдек, Ўзбекистон миллий педагогика университети Низомий Ганжавий номидаги Ўзбекистон миллий педагогика университети деб қайта номланди.
Қарорга кўра, педагог кадрлар тайёрлаш соҳасидаги қатор вазифалар ҳам Олий таълим, фан ва инновациялар вазирлигига юклатилди.
Улар қаторига олий маълумотли педагог кадрлар тайёрлаш сиёсатини ягона концептуал ёндашув асосида юритиш, педагогик таълимни ривожлантиришнинг устувор йўналишларини белгилаш, таълим жараёнига илғор педагогик ва ахборот технологияларини жорий этиш киради.
Шунингдек, педагогика соҳасидаги илмий-тадқиқот ва инновацион фаолиятни ривожлантириш ҳамда педагог кадрлар тайёрлайдиган олий таълим муассасаларининг бошқарув тизимини такомиллаштириш ҳам вазирлик зиммасига юкланди.
