Ҳужжат 2026 йил 14 сентябрда 3939-сон билан давлат рўйхатидан ўтказилган.

Тиббий текширув гиёҳвандлик воситаларини истеъмол қилиш ҳолатларини барвақт аниқлаш мақсадида Республика суд-тиббий экспертиза илмий-амалий маркази ва унинг ҳудудий филиалларида ўтказилади.

Муддатли ҳарбий хизматга чақирилаётган фуқаролар ҳудудий ҳарбий-тиббий комиссияга юборилишидан олдин, контракт бўйича ҳарбий хизматга қабул қилинаётганлар эса ҳарбий-тиббий муассасада тиббий кўрикдан ўтишларидан олдин мазкур текширувдан ўтказилади.

Тиббий текширув икки босқичда амалга оширилади. Дастлаб пешоб намунаси экспресс-тест орқали текширилади. Мусбат натижа қайд этилган тақдирда пешоб ва (ёки) қон намуналарида масс-спектрометрик идентификация текшируви ўтказилади.

Тиббий текширув натижалари мусбат бўлган ёки зарур биологик намуналарни топширишдан бош тортган фуқаролар ҳарбий-тиббий кўрикдан ўтказилмайди.

Шунингдек, тиббий текширув давомида олинган шахсга оид маълумотлар, биологик намуналар ва текширув натижаларининг махфийлиги таъминланади.