Ёшлар спорт ўйинлари натижасини олдиндан айтиш, яъни таваккал қилиб пул тикишмоқда. Бу хилдаги ишқибозлик кўпинча жиддий қарамликнинг ривожланишига олиб келади.
Замонавий ўсмирлар қимор ўйинлари тўғридан-тўғри смартфонларида мавжуд бўлган дунёда яшаяпти. Икки мингга яқин ёшлар ўртасида ўтказилган сўровнома шуни кўрсатдики, респондентларнинг 52,5 фоизи сўнгги 12 ой ичида қандайдир ставкалар қўйган. Тадқиқот натижалари Рутгерс университети (АҚШ) томонидан эълон қилинди, деб хабар берди science.mail.ru.
Ёшлар анъанавий лотереялар ва спорт гаровларидан ташқари янги молиявий воситаларни ҳам фаол ўзлаштирмоқда. Гап криптовалюта трейдинги ва башорат бозорлари ҳақида кетмоқда, бу ерда фойдаланувчилар пулларини турли жаҳон воқеалари натижасига ҳам тикишади. Тахминан ҳар ўнинчи ўйинчи ўсмир қарамлик ривожланишининг юқори хавфи белгиларини кўрсатди. Бу кўрсаткич катта ёшдагилар статистикасидан деярли фарқ қилмайди ва йигитлар орасида ҳам, қизлар орасида ҳам бир хил.
Ижтимоий тармоқлардаги агрессив рекламалар вазиятни янада оғирлаштирмоқда.
Оила таъсири: болалар таваккал қилишни қаерда ўрганади
Мутахассислар бу каби хавфли одатнинг шаклланишида атроф-муҳит катта роль ўйнаяпти деб ҳисоблайди. Эътибор қилинг – бу борада муаммоли ўсмирларнинг аксарияти оила аъзолари билан бирга ўйнаганликларини тан олишди. Яна камига денг, кўпчиликнинг қиморбозликка қизиқувчан яқинлари бор. Бунинг устига ижтимоий тармоқлардаги агрессив рекламалар вазиятни янада оғирлаштирмоқда.
Алгоритмлар фойдаланувчиларга ставкалар билан контентни фаол таклиф қилаётир, машҳур блогерлар эса ўйин платформаларини тарғиб қилишдан тўхтамаётир.
Тадқиқотчилар ўйинларга қарамликнинг олдини олиш ёндашувини қайта кўриб чиқишга чақирмоқда. Уларнинг таъкидлашича, оддий кўнгилхушлик, молиявий инвестициялар ва интернетдаги хавфли қимор ўртасидаги чегара жуда нозик бўлиб қолган.
Аввалроқ тадқиқотчилар миллионлаб ўсмирлар ўйин харидлари тузоғига тушиб қолганини аниқлаган эди.
