Жорий ўқув йилида олийгоҳларнинг 209,1 минг нафар 1-босқич талабаси илк бор талабалик ҳаётига қадам қўйди.
Янги ўқув йилининг илк кунида олий таълим ташкилотларида Ўзбекистон Республикаси давлат мустақиллигининг 35 йиллигига бағишланган “Келажак соати” маърифий дарслари ўтказилмоқда.
Ушбу дарсларда ёшларга мамлакатимиз мустақиллик йилларида босиб ўтган тараққиёт йўли, амалга оширилаётган кенг кўламли ислоҳотлар, Янги Ўзбекистоннинг бугунги тараққиёт босқичи ҳамда ёшларнинг мамлакат келажагини барпо этишдаги ўрни ҳақида фикр-мулоҳазалар билдирилмоқда.
Шунингдек, дастлабки ўқув ҳафталигида биринчи босқич талабалари учун “Биринчи курс мактаби”, “Кредит таълими тизимига кириш” ҳафталиги ҳамда “Талабаликка бағишлов” тадбирлари ташкил этилмоқда.
Мазкур тадбирлар доирасида талабаларга кредит-модул тизими, академик ҳалоллик тамойиллари, мустақил таълимни ташкил этиш, касбий ривожланиш имкониятлари ва олий таълим тизимидаги рақамли хизматлардан фойдаланиш бўйича амалий кўмак кўрсатилади.
Юқори босқич талабалари учун эса дарс машғулотлари 14 сентябрдан бошланади.
Янги ўқув йили арафасида талабалар учун зарур инфратузилмани яратиш ва уларни муносиб кутиб олиш мақсадида қатор амалий ишлар амалга оширилди. Хусусан, 13 та олий таълим ташкилотида жами 6 200 ўринли янги талабалар турар жойлари ҳамда 3500 ўринли ўқув бинолари фойдаланишга топширилди.
Шунингдек, талабаларни турар жойларга тизимли жойлаштириш мақсадида олийгоҳларда тезкор штаблар, “Қалқон” гуруҳлари, тюторлар ва волонтёрлар жамоалари ҳамда Call-марказлар фаолияти йўлга қўйилди.
408 та талабалар турар жойидаги 167 минг ўринга талабаларни жойлаштириш ишлари давом этмоқда. Бунда ижтимоий ҳимояга муҳтож ёшларга устуворлик берилмоқда.
