Қиймати 19 миллиард сўм бўлган мажмуа Паркент туманини ижтимоий-иқтисодий ривожлантириш доирасида қисқа муддатда барпо этилди.
Очилиш маросимида Тошкент вилояти ҳокими Зойир Мирзаев, Ўзбекистон Республикаси Президенти маслаҳатчиси, халқ ёзувчиси Хайриддин Султонов, Ўзбекистон Ёзувчилар уюшмаси раиси Сирожиддин Саййид, Республика Маънавият ва маърифат маркази раҳбари Отабек Ҳасанов, Ўзбекистон Миллий ахборот агентлиги бош директори, сенатор Абдусаид Кўчимов ва бошқа меҳмонлар иштирок этди.
Кутубхонадан тортиб ижодий тўгаракларгача
Янги мажмуада замонавий ахборот-кутубхона маркази, Ёшлар ишлари агентлиги ва Маънавият ва маърифат маркази фаолияти йўлга қўйилган. Шунингдек, ёшлар учун турли тўгараклар ташкил этилган.
Бу имкониятлардан фойдаланиб, ёшлар китоб ўқиш, билимларини ошириш ва ўз қизиқишлари бўйича шуғулланишлари мумкин. Марказда адабий учрашувлар, китоб тақдимотлари ва ижодий суҳбатлар ўтказиш ҳам кўзда тутилган.
Тадбирда сўзга чиққанлар китобхонликни ривожлантириш, миллий адабиёт ва маънавий меросни асраб-авайлаш, ёшларнинг мустақил фикрлаши ва ижодий изланишларини қўллаб-қувватлаш масалаларига тўхталди.
Паркентнинг ижодий анъаналари давом этади
Мажмуа очилишида ҳудуднинг адабиёт, илм-фан ва маданият ривожига қўшган ҳиссаси ҳам эътироф этилди. Паркентдан етишиб чиққан Ориф Одилхонов, Шарифа Салимова, Маҳмуд Тоир, Хайриддин Султонов, Дилфуза Шомаликова, Маъсума Аҳмедова, Усмон Бек ва Зоҳиджон Олов каби ижодкорларнинг фаолияти ёш авлод учун ибрат сифатида тилга олинди.
Ўзбекистон халқ шоири Маҳмуд Тоир янги масканнинг очилишини туман ёшлари учун муҳим воқеа деб баҳолади. Унинг таъкидлашича, ушбу ҳудуд илгари ҳам байрамлар ва белбоғли кураш мусобақалари ўтказиладиган манзил бўлган. Энди эса маскан замонавий қиёфада аҳолига хизмат қилади.
Вилоятда бир миллиондан зиёд китоб фонди мавжуд
Тошкент вилоятида ахборот-кутубхона хизматини ривожлантириш борасида ҳам ишлар олиб борилмоқда. Тақдим этилган маълумотларга кўра, ҳудудда 21 та ахборот-кутубхона маркази фаолият юритади. Уларнинг умумий китоб фонди бир миллион нусхадан зиёд, фойдаланувчилар сони эса 353 минг нафарни ташкил этади.
«Қўшчинор»нинг очилиши ушбу тизим имкониятларини кенгайтириш билан бирга, Паркентда маънавий-маърифий тадбирлар учун янги майдон пайдо бўлганини англатади.
Маросим якунида меҳмонлар мажмуа ҳудудига манзарали дарахт кўчатларини экиб, марказда яратилган шароитлар билан танишди.
Янги масканнинг самараси, аввало, унга ташриф буюрадиган китобхонлар, тўгаракларга жалб этиладиган ёшлар ва бу ерда ташкил этиладиган маърифий тадбирлар кўламида намоён бўлади.
