Бу ҳақда "Дунё" АА маълум қилди.
Қайд этилишича, мулоқот давомида Ўзбекистон Маданий мерос агентлиги вакиллари Бухородаги Пойи Калон мажмуасини реставрация қилиш бўйича қўшма лойиҳани ишлаб чиқиш ва амалга ошириш масалаларини муҳокама қилди. Мазкур мажмуа Бухоронинг тарихий маркази таркибига кирувчи муҳим маданий мерос объекти ҳисобланади.
Учрашувда ЮНЕСКО томони Ўзбекистоннинг маданий меросни муҳофаза қилиш борасидаги саъй-ҳаракатларини юқори баҳолаб, тарихий ёдгорликларни асраб-авайлаш ва келажак авлодларга етказиш бўйича амалга оширилаётган ишларга ижобий баҳо берди.
Шунингдек, “CRATerre” вакиллари “Пойи Калон”ни реставрация қилиш лойиҳасини халқаро илғор тажриба ва замонавий ёндашувлар асосида биргаликда амалга оширишга тайёр эканини билдирди.
Томонлар мажмуанинг юқори тарихий ва маданий аҳамиятини инобатга олган ҳолда, ушбу ташаббус халқаро ҳамкорликнинг намунавий лойиҳасига айланиши мумкинлигини таъкидлади.
Учрашувда, шунингдек, мажмуани узоқ муддатли сақлаш мақсадида кўп йиллик комплекс консервация режасини ишлаб чиқиш, маҳаллий мутахассисларни жараёнга кенг жалб қилиш ва уларнинг реставрация ҳамда маданий меросни бошқариш соҳасидаги малакасини ошириш масалаларига ҳам алоҳида эътибор қаратилди.
Суҳбат якунида “CRATerre” ва ЮНЕСКО Жаҳон мероси маркази вакилларининг Ўзбекистонга ташрифи бўйича дастлабки келишувга эришилди. Ташриф давомида экспертлар Пойи Калон мажмуасининг техник ҳолатини жойида ўрганиб, маҳаллий мутахассислар билан маслаҳатлашиши ҳамда лойиҳа тафсилотларини муҳокама қилиши режалаштирилган.
