Янги Ўзбекистонда юртдошларимиз кўзида қувонч, қалбида ишонч билан яшаётганининг сири шунда. Хусусан, нуронийлар, меҳнат фахрийлари ва жамият ривожига муносиб ҳисса қўшган инсонларга юксак эътибор ва ғамхўрлик кўрсатилмоқда.

Бу йил 100 нафар юртдошимиз ­Президентимиз йўлланмаси билан муқаддас ҳаж амалларини адо этиш бахтига муяс­сар бўляпти. Шунинг ўзиёқ юқоридаги фик­римизнинг яққол далили бўла олади. Ана шундай бахтиёр инсонлар сафида Навоий вилоятидан ҳам уч нафар нуроний отахон бор. Вилоят ҳокими ­Нормат ­Турсунов Кармана туманида яшовчи, ижтимоий соҳа фахрийси Дилмурод Холовга ҳаж сафари учун Президентимиз йўлланмасини топширди.

Дилмурод Холов узоқ йиллар давомида маҳалла тизимида масъул лавозимларда самарали фаолият юритган. Ана шу йиллар давомида аҳоли ўртасида ҳамжиҳатлик, меҳр-оқибат ва ўзаро ҳурмат муҳитини мус­таҳкамлашга муносиб ҳисса қўшган. Кўп йиллик ҳалол ва фидокорона меҳнати учун у “Шуҳрат” медали ва “Меҳнат фахрийси” I даражали кўкрак нишонига муносиб ­кўрилган. Ҳозир маҳалладаги “Кексалар маслаҳати” гуруҳи раиси сифатида жамоатчилик ишларида фаол.

— Қувончимнинг чеки йўқ, — дейди Дилмурод бобо. — Юртимизда инсон қад­ри нақадар улуғланишига яна бир бор амин бўлдим. Маҳалладаги нуронийлар билан бирга аҳоли фаровонлиги, оилалар тинчлиги ва ёшлар тарбиясига ҳисса қўшиб келяп­миз. Ҳаж зиёратига бориб келганимиздан кейин ҳам ушбу эзгу ишларни давом эттиришга ваъда бераман. Йўлланма билан ҳажга боришимни эшитиб, кўз ёшимни тўхтата олмадим.

Хатирчи туманидаги Тинчлик маҳалласида истиқомат қилувчи Азамат Мавлонов ҳам ана шундай юксак шарафга муносиб кўрилди. Қаҳрамонимиз кўп йиллар юрт фаровонлиги, маҳалла тинчлиги йўлида сид­қидилдан меҳнат қилган. Айниқса, маҳалла раиси сифатида фаолият юритган йиллари одамларнинг дарди билан яшаб, муаммоларини ҳал этишда фидойилик кўрсатди.

— Муборак ҳаж зиёратига бориш юрагимга тугиб қўйган орзуим эди, — дейди Азамат Мавлонов. — Кутилмаганда қувонч­ли хабар келди ва дастлаб ахир ҳеч қаерга мурожаат қилмагандим, дея ишонмадим. Лекин вилоят ҳокимлиги мутасаддилари келиб, йўлланмани топширганида ишондим. Олис қишлоқда яшасам-да, эътибор ва эҳтиромни ҳис қилдим.

Хатирчининг Маданият маҳалласида яшовчи Раҳматилло Абдураимов кўп йиллар давомида ўқитувчилик қилиб, ёш авлодга таълим-тарбия берган. Муаллим шу улуғ йўлда фидойилик кўрсатиб, кўплаб шогирдларни ҳаётга тайёрлади. Доим ёшларни ватанпарварлик, инсонпарварлик руҳида тарбиялашга интилди. Бугун устознинг меҳнати юксак эътироф этилиб, ҳаж йўлланмасига эга бўлиши барча таълим фидойилари учун ҳам катта ҳурмат ва эътибор намунасидир.

 

* * *

Ҳаж сафарига йўлланма олганлар сафида Сурхондарё вилоятидан ҳам 7 киши бор.

Жарқўрғон туманидаги Алишер Навоий маҳалласида яшайдиган Эшмурод Чориев ҳалол меҳнат, эл-юртга садоқат ва инсонларга яхшилик қилишни ўзининг ҳаётий мезони деб билади. Қаҳрамонимиз маҳаллада ҳурмат қозонган нуронийлардан бири.

Эшмурод бобо умрини фарзанд тарбия­сига, юрт тинчлиги ва маҳалла ободлигига бағишлади. Тўрт фарзандни ватанпарварлик, меҳнатсеварлик ва миллий қадриятларга ҳурмат руҳида тарбиялади. Уларни юртимизга муносиб инсонлар қилиб вояга етказди. Ана шундай намунали ҳаёт йўли эътирофга муносиб кўрилди. Вилоят ҳокими Президентимиз табригини ўқиб эшиттириб, унга муборак ҳаж сафари учун йўлланмани тантанали равишда топширди.

— Хушхабарни эшитиб, кўнглим тоғдек кўтарилди. Ишлаган одам барибир қачондир давлатдан, халқдан эъзоз топаркан, — дейди меҳнат фахрийси Эшмурод Чориев. — Буни ҳаётим мисолида кўриб турибман. Ушбу ­эътибор оилам ва яқинларим каби бошқаларни ҳам қувонтирди.

Ботир Менглиев Ангор туманидаги ­Қорақир маҳалласида йиллар давомида эл-юрт учун фидокорона меҳнат қилганлардан бири. У 23 йил мобайнида маҳалла раиси вазифасида самарали фаолият юритиб, аҳоли ишончи ва ҳурматини қозонди. Кўп йиллик ҳалол ва самарали меҳнат эса, албатта, муносиб эътироф топди. Ботир Менглиевга махсус ҳаж йўлланмаси тантанали равишда топширилди.

Қумқўрғонлик Равшан Сафаров деҳқончилик ва қишлоқ хўжалиги соҳасида орттирган бой тажрибаси, меҳнатсеварлиги ва камтарлиги билан маҳалла аҳли орасида алоҳида ҳурматга эга. Равшан бобонинг йиллар давомидаги сидқидилдан қилган меҳнатлари, халқ фаровонлиги йўлидаги хизматлари, албатта, бесамар кетмади. Мамлакат раҳбари йўлланмаси билан ҳаж амалларини адо этиш бахтига муяссар бўлиш арафасида.

Довуд Хўжамшукуров эса узоқ йиллар Бандихон туманидаги Саидмуҳаммад жоме масжидида мутавалли вазифасида сидқидилдан хизмат қилган. Қаҳрамонимиз меҳнат фаолияти давомида масжид ободлиги ва жамоат бирлигини таъминлашга муносиб ҳисса қўшди. Шу орқали халқимизга маънавий-маърифий хизмат қилди.

— Қалбимда узоқ йиллар давомида муқаддас ҳаж зиёратига бориш ниятини асраб келардим. Бироқ ҳаёт ташвишлари ва имконият чеклангани туфайли бу орзу гўёки ушалмас армонга айланиб бораётгандек эди. Шунга қарамай, сабр ва шукроналик билан эл хизматида бўлишда давом этдим. Инсоннинг эзгу нияти ва ҳалол меҳнати ҳеч қачон бесамар кетмас экан. Президентимизнинг махсус ҳаж йўлланмаси менга ҳам тантанали равишда топширилди, — дейди меҳнат фахрийси Довуд Хўжамшукуров.

Ҳаж инсон қалбини поклайдиган, уни эзгулик, сабр-тоқат, шукроналик ва бағрикенгликка чорлайдиган улуғ ва муқаддас ибодатдир. Бу муборак сафар нафақат инсоннинг маънавий камолотига, балки жамиятда меҳр-оқибат, ҳамжиҳатлик ва эзгулик муҳитини мустаҳкамлашга ҳам хизмат қилади.

Президентимиз номидан йўлланмаларни топшириш тадбирларида бўлажак ҳожилар муқаддас амалларни бажариш чоғида юртимиз тинчлиги, халқимиз фаровонлиги, мамлакатимиз тараққиёти ва эл-юрт осойишталиги учун дуолар қилишини таъкидлади. Бундай эзгу ишлар халқимиз қалбида шук­роналик туйғуларини янада мустаҳкамлаб, юртимизда меҳр-оқибат, инсонпарварлик ва бағрикенглик муҳитини юксалтиришга хизмат қилиши эътироф этилди. Зеро, инсон қадри улуғланган юртда эзгулик ва барака ҳамиша барқарор бўлади.

 

Ғолиб АБДУСАЛОМОВ,

Сарвар ТЎРАЕВ,

“Янги Ўзбекистон” мухбирлари