Қонун лойиҳаси билан профилактика инспекторларининг ҳуқуқий мақоми, асосий вазифалари, ҳуқуқ ва мажбуриятлари, жавобгарлиги ҳамда хизматни ўташ тартибини аниқ белгилаш таклиф этилмоқда.
Ҳужжатда профилактика инспекторининг касбий фаолиятига асоссиз аралашиш, уни хизмат вазифаларига алоқадор бўлмаган ишларга жалб қилиш ва унга қўшимча вазифалар юклашга йўл қўймаслик белгиланмоқда.
Шунингдек, профилактика инспекторларининг аҳоли олдидаги ҳисобдорлигини кучайтириш назарда тутилган. Унга кўра, инспекторлар ҳар чоракда хизмат ҳудудида амалга оширилган ишлар юзасидан аҳоли ва жамоатчилик олдида ҳисобот бериши керак бўлади.
Қонун лойиҳасида аҳолининг профилактика инспектори фаолиятига нисбатан «ишончсизлик ташаббуси»ни билдириш механизмини жорий этиш ҳам таклиф қилинмоқда.
Бундан ташқари, профилактика инспекторларининг ижтимоий-ҳуқуқий ҳимоясини кучайтириш, уларнинг шаъни ва қадр-қимматини давлат томонидан ҳимоя қилиш, меҳнатига муносиб ҳақ тўлаш, хизмат ва уй-жой шароитларини яхшилаш ҳамда самарали фаолият юритаётган ходимларни рағбатлантириш бўйича кафолатлар белгиланмоқда.
Қайд этилишича, қонуннинг қабул қилиниши ҳуқуқбузарликлар профилактикасини янги босқичга олиб чиқиш, маҳаллаларда хавфсиз муҳитни таъминлаш, профилактика инспекторларининг масъулияти ва аҳоли билан ишлаш самарадорлигини оширишга хизмат қилади.
Муҳокамалар якунида қонун лойиҳаси депутатлар томонидан биринчи ўқишда қабул қилинди.
