Бу ҳақда Рақобат қўмитаси хабар берди.

Маълум қилинишича, Президентнинг 2022 йил 26 октябрдаги ПҚ–411-сон қарори асосида дори воситалари нархларини назорат қилиш ва истеъмолчилар ҳуқуқларини ҳимоя қилиш бўйича рақамлаштирилган тизим жорий этилган. Ушбу тизим орқали дори воситалари нархларининг асоссиз оширилиши инсон омилисиз аниқланмоқда.

Шунингдек, 2026 йил март ойидан дори воситалари референт нархларини назорат қилиш тизими янада такомиллаштирилди. Энди улгуржи савдода белгиланган референт нархдан юқори нарх қўлланилганда, солиқ органлари томонидан ҳисоб-фактураларни рўйхатга олиш автоматик тарзда тўхтатилади.

Қайд этилишича, бу механизм орқали улгуржи савдода нархларни сунъий ошириш ҳолатларининг олди олиниб, 12,5 мингдан зиёд чакана дорихонада дори воситаларини қиммат сотишга чек қўйилмоқда.

Текширувлар давомида 2,5 мингга яқин дорихона томонидан қарийб 686 минг ҳолатда чекланган савдо устамаси 10 фоиздан уч баробаргача ошириб қўллангани аниқланган. Натижада истеъмолчилардан 21,1 миллиард сўм асоссиз маблағ олингани маълум бўлиб, уни қайтариш бўйича чоралар кўрилган.

Хусусан, 2026 йилнинг биринчи чорагида 190 дан ортиқ дорихонада 110,5 мингга яқин ҳолатда 1,4 миллиард сўмдан зиёд маблағ асоссиз олингани қайд этилган.

Фуқароларга дори воситаларини харид қилишда ваколатли ташкилотнинг референт нархлар реестри орқали нархларни текшириб бориш ва қоидабузарлик ҳолатлари аниқланса, Рақобат қўмитасининг 1159 ишонч рақамига мурожаат қилиш тавсия этилди.