Дастлабки маълумотларга кўра, 6 сентябрдан 7 сентябрга ўтар кечаси Ғузор тумани Қовчин МФЙнинг Араб қишлоғи ҳудудида экополиция инспекторлари томонидан экологик назорат рейди ўтказилган.
Рейд давомида Қашқадарё дарёсининг муҳофаза этиладиган ҳудудида ноқонуний қум-шағал қазиб олинаётгани аниқланган. Инспекторлар қонунбузарликни тўхтатиб, техникани жарима майдонига олиб кетаётган вақтда ҳуқуқбузарлар уларга фаол қаршилик кўрсатган.
Жумладан, давлат рақамисиз қора рангли «КИА К5», шунингдек, 70 К 413 АА давлат рақамли «Lacetti» ва «Cobalt» автомашиналарида келган шахслар йўлни тўсиб, инспекторлардан бирига тан жароҳати етказган. Шунингдек, жарима майдонига олиб кетилаётган техника воситасини олиб қочган.
Дастлабки маълумотларга кўра, жабрланган инспектор Баҳром Тошпўлатов Қашқадарё дарёсидаги ноқонуний қум-шағал қазиб олиш ҳолатларини аниқлаш бўйича рейд тадбирида ҳуқуқбузарлар ҳужумига учраган.
У шу ҳудудда фуқаролардан бири томонидан ҳушсиз ҳолда топилиб, шифохонага олиб келинган. Ҳозирда унга тиббиёт муассасасида зарур тиббий ёрдам кўрсатилмоқда.
Мазкур икки ҳолат юзасидан Ғузор туман прокуратураси ва ИИБнинг тезкор-тергов гуруҳи томонидан терговга қадар текширув олиб борилмоқда.
