Ижтимоий тармоқларда кенг далада лолаларга зарар етказган ҳолда қўшиқ айтилаётгани ва автомобилда гуллар босиб ўтилгани акс этган видеолар тарқалган эди. Ушбу ҳолатлар Экология, атроф-муҳитни муҳофаза қилиш ва иқлим ўзгариши вазирлиги ҳудудий бошқармаси инспекторлари томонидан ўрганилди.
Текширув натижасига кўра, биринчи ҳолатда табиатга 6 млн 592 минг сўм зарар етказилгани аниқланди. Ҳуқуқбузарлар А.Ж. ва Г.Б.га нисбатан Маъмурий жавобгарлик тўғрисидаги кодекснинг 79-моддаси 1-қисми асосида баённома расмийлаштирилиб, ҳар бирига базавий ҳисоблаш миқдорининг 25 баробари — 10 млн 300 минг сўмдан, жами 20 млн 600 минг сўм жарима тайинланди.
Иккинчи ҳолатда ҳам худди шундай миқдорда зарар етказилгани маълум бўлди. Ҳуқуқбузар М.Р.га нисбатан эса ушбу модда асосида базавий ҳисоблаш миқдорининг 50 баробари — 20 млн 600 минг сўм жарима қўлланилди.
Шу тариқа, ҳар икки ҳолат бўйича ҳуқуқбузарлар жами 54 млн 384 минг сўм тўлайдиган бўлди.
Мутахассислар таъкидлашича, дунёда 100 га яқин лола тури мавжуд бўлиб, уларнинг қарийб 75 таси Марказий Осиёга тўғри келади. Ўзбекистон ҳудудида эса 34 турдаги ёввойи лолалар ўсади ва уларнинг аксарияти Қизил китобга киритилган. Шунингдек, айрим турлар фақат Ўзбекистонда учрайди.
Ёввойи лолалар табиатнинг ноёб бойлиги бўлиб, уларни асраб-авайлаш ва келажак авлодга етказиш ҳар биримизнинг масъулиятимиздир.
