Ички ишлар вазирлиги Тезкор-қидирув департаменти ва унинг ҳудудий бўлинмалари ҳамкорлигида Самарқанд вилоятининг Ургут туманида тезкор тадбир ўтказилди.
Аниқланишича, 1979 йилда туғилган аёл уч нафар ҳамтовоғи ва куёви билан биргаликда Ургут туманидаги Мўминобод маҳалласида жойлашган хонадонда 1 килограмм опийни харидорга 30 минг АҚШ долларига сотаётган бўлган.
Маблағни қўлга киритиш мақсадида улар ўткир тиғли буюмлар билан уч нафар харидорга ҳужум қилиб, оғир тан жароҳатлари етказган. Шундан сўнг уюшган жиноий гуруҳ аъзолари тезкор тадбир иштирокчилари томонидан қўлга олинган.
Мазкур ҳолат юзасидан Жиноят кодексининг 219-моддаси иккинчи қисми, 273-моддаси олтинчи қисмининг «а» банди ҳамда 104-моддаси иккинчи қисмининг «б», «е», «к», «л» бандлари билан жиноят иши қўзғатилган.
Фарғонада Тошкентга олиб кетилаётган опий аниқланди
Фарғона вилоятининг Данғара туманида ўтказилган тезкор тадбирда 1985 йилда туғилган, муқаддам Жиноят кодексининг 169-моддаси иккинчи қисми билан судланган фуқаро жиноий шериги билан бирга қўлга олинган.
Улар 1 килограмм 24 грамм опий гиёҳвандлик воситасини олиб кетаётган бўлган. Суриштирувлар давомида мазкур моддаларни Тошкент шаҳридаги жиноий шерикларига етказиб бериш режалаштирилгани аниқланган.
Ушбу ҳолат юзасидан ҳам Жиноят кодексининг 273-моддаси тегишли қисми билан жиноят иши қўзғатилган.
Ҳуқуқни муҳофаза қилувчи органлар республика ҳудудида гиёҳвандлик ва психотроп моддалар билан боғлиқ жиноятларнинг олдини олишга қаратилган тезкор-қидирув тадбирларини давом эттирмоқда.
Шубҳали шахслар ёки уларнинг фаолияти ҳақида маълумотга эга бўлган фуқаролардан Telegram ижтимоий тармоғидаги «Stop narkobod» каналига мурожаат қилиш сўралган.
