«Қорадори-2026» кенг қамровли тезкор-профилактик тадбирлари давомида Ички ишлар вазирлиги Тезкор-қидирув департаменти ҳамда унинг ҳудудий бўлинмалари ходимлари ҳамкорлигида бир қатор тезкор тадбирлар ўтказилди.
Тошкент вилоятида ўтказилган тезкор-қидирув тадбири натижасида 1965 йилда туғилган, муқаддам Жиноят кодексининг 167- ва 276-моддалари билан судланган омборчи ҳамда 1961 йилда туғилган, муқаддам Жиноят кодексининг 167- ва 276-моддалари билан судланган наркотик курьер ака-укалар жиноий шерикликда ишлаб келгани аниқланган.
Маълум бўлишича, улар нарко-дўкон куратори топшириғига асосан бошқарувида бўлган «Орландо» русумли автомашинада Бектемир тумани ҳудудидаги дала майдонида яшириб кетилган 550 грамм мефедрон синтетик гиёҳвандлик воситасини олиб, қочишга уринган вақтда тезкор ходимлар томонидан қўлга олинган.
Наркожиноий гуруҳлар фаолиятига чек қўйишга қаратилган навбатдаги тезкор-қидирув тадбирлари Тошкент шаҳрининг Юнусобод туманида давом эттирилди.
1992 йилда туғилган, муқаддам Жиноят кодексининг 276-моддаси 2-қисми билан судланган шахснинг автомашинаси тўхтатилиб текширилганда, унинг ёнидан 202 грамм мефедрон синтетик гиёҳвандлик воситаси аниқланган. Ашёвий далиллар процессуал тартибда расмийлаштириб олинган.
Давом эттирилган тезкор тадбир натижасида унинг яшаш хонадондан гиёҳвандлик воситаларини қадоқлаш учун мўлжалланган изолента, тарози ва зип-пакетлар ҳам ашёвий далил сифатида олинган.
Шундан сўнг жиноий гуруҳнинг қолган аъзоларини қўлга олишга қаратилган тезкор тадбирлар ўтказилди. Натижада мазкур туман ҳудудида нарко-дўкон куратори томонидан ташлаб кетилган локациядан 50 грамм мефедрон синтетик гиёҳвандлик воситасини олаётган, муқаддам Жиноят кодексининг 276-моддаси билан судланган закладчик қўлга олинган.
Сергели туманида ўтказилган тезкор тадбир давомида эса 2008 йилда туғилган қиз яшаётган хонадонда 280 грамм «альфа-PVP», 300 грамм мефедрон ва 81 грамм гашиш гиёҳвандлик воситаларини сақлаб келаётгани аниқланган. Мазкур моддалар белгиланган тартибда ашёвий далил сифатида расмийлаштириб олинган.
Ўтказилган тезкор-қидирув тадбирлари натижасида жами 2 килограммга яқин гиёҳвандлик воситаларининг аҳоли орасида тарқалишининг олди олинган.
Мазкур ҳолатлар юзасидан наркотик жиноий ҳаракатларни содир этган шахсларга нисбатан Ўзбекистон Республикаси Жиноят кодексининг 273-моддаси 5-қисми «а» банди билан жиноят иши қўзғатилган.
Агар сиз ҳам шубҳали шахслар ёки уларнинг фаолияти ҳақида маълумотга эга бўлсангиз, Telegram ижтимоий тармоғидаги «Stop narkobod»га мурожаат қилишингиз сўралади.
Республика ҳудудлари бўйлаб гиёҳвандлик ва психотроп моддалар билан боғлиқ жиноятларни бартараф этишга қаратилган кенг кўламли тадбирлар давом эттирилмоқда.
