Унда Ўзбекистон Республикаси Биринчи хоними Зироат Мирзиёева, шунингдек, саммитда иштирок этаётган биринчи хонимлар ва юқори мартабали меҳмонлар қатнашди.
Президент ҳузуридаги Ижтимоий ҳимоя миллий агентлиги тизимига кирувчи марказда мактабгача таълим, коррекцион-педагогик ёрдам ва комплекс реабилитация хизматлари бирлаштирилган. Ҳар бир бола учун унинг индивидуал эҳтиёжларидан келиб чиқиб, алоҳида дастур ишлаб чиқилади. Ота-оналар эса фарзандлари эгаллаган кўникмаларни уй шароитида мустаҳкамлаш бўйича мутахассислардан тавсиялар олади.
Марказнинг мактабгача таълим бўлими 150 ўринга мўлжалланган бўлиб, 2 ёшдан 7 ёшгача бўлган болалар учун 10 та ихтисослаштирилган гуруҳни ўз ичига олади. Амбулатор бўлимда эса 2 ёшдан 18 ёшгача бўлган ойига қарийб 100 нафар бола реабилитация курсларидан ўтиши мумкин.
Бу ерда даволовчи жисмоний тарбия, нутқ ва майда моторикани ривожлантириш, сенсор интеграция машғулотлари, физиотерапия ҳамда бошқа муолажалар ўтказилади. Марказда етти йўналишдаги шифокорлар, дефектолог-педагоглар, логопедлар, психологлар, реабилитация мутахассислари ва бошқа ходимлар фаолият юритади.
Самарқанддаги марказ Нукус, Қибрай, Қарши ва Зарафшондаги муассасаларни бирлаштирган «IMKON» тармоғининг янги бўғини бўлди.
2025 йилда тармоқ муассасаларида 546 мингдан ортиқ муолажа ва машғулот ўтказилган, 3 777 нафар бола амбулатор реабилитациядан ўтган.
Тармоқни кенгайтириш ишлари ҳам давом этмоқда. Хусусан, Фарғонада марказ қурилиши бошланган. Наманган ва Тошкент вилоятининг Нурафшон шаҳрида ҳам шундай муассасалар барпо этиш режалаштирилган.
