Сессияда қуролли низолар ва турли инқирозли вазиятларнинг ёшлар ҳаётига таъсири, уларнинг ҳуқуқ ва манфаатларини ҳимоя қилиш, таълим олиш имкониятларини таъминлаш ҳамда тинч ва хавфсиз ҳаёт кечириши учун зарур шароитлар яратиш масалалари муҳокама қилинди.
Муҳокамада иштирок этган БМТ Қочқинлар ишлари бўйича олий комиссарининг Марказий Осиёдаги вакили, Парламентлараро иттифоқнинг инсон ҳуқуқлари бўйича қўмитаси, Ёш парламент аъзолари бюроси, Ўзбекистон, Кения, Сербия ва Таиланд парламентлари вакиллари ўз фикр-мулоҳазалари ва таклифларини билдирди.
Сўзга чиққанлар низолар шароитида ёшларнинг ҳуқуқларини самарали ҳимоя қилишда халқаро ҳамкорликни кучайтириш, уларга зарур ижтимоий ва гуманитар ёрдам кўрсатиш, таълим ва ривожланиш имкониятларини сақлаб қолиш масалаларига алоҳида эътибор қаратди.
Шунингдек, парламентларнинг ёшлар ҳуқуқ ва манфаатларини ҳимоя қилиш, ёшларнинг муаммоларига ечим топишга қаратилган қонунчилик ва парламент назорати механизмларини такомиллаштиришдаги ўрни хусусида фикр алмашилди.
Сессия якунида ёшлар ҳуқуқларини ишончли ҳимоя қилиш, уларнинг тинчлик ўрнатиш ва жамиятларни тиклаш жараёнларидаги иштирокини кенгайтириш, шунингдек, мазкур йўналишда парламентлар ва халқаро ташкилотлар ўртасида ҳамкорликни янада кучайтириш муҳимлиги қайд этилди.
