Франция тараққиёт агентлиги ва Европа Иттифоқи иштирокида амалга оширилаётган лойиҳалар доирасида Шаҳрисабз шаҳри ва Китоб тумани марказида оқова сув тизимларини реконструкция қилиш ва қуриш, шунингдек, Навоий вилоятининг Кармана туманида оқова сув тизимини барпо этиш бўйича муҳим шартномалар имзоланди.
Хусусан, оқова сувларни тозалаш иншоотларини қуриш, шунингдек, қурилиш ишлари устидан техник назорат ва консалтинг хизматларини кўрсатиш бўйича шартномалар расмийлаштирилди.
Маросимда Франциянинг Ўзбекистондаги элчихонаси, Европа Иттифоқи делегацияси, Франция тараққиёт агентлиги, қурилиш ва техник назорат компаниялари ҳамда «Ўзсувтаъминот» АЖ раҳбарияти вакиллари иштирок этди.
Китобда илк бор марказлашган оқова сув хизмати йўлга қўйилади
Лойиҳанинг аҳоли учун энг муҳим жиҳатларидан бири — Китоб тумани марказида илк бор марказлашган оқова сув хизмати ташкил этилишидир.
Айни пайтда ҳудудда канализация тизими мавжуд эмас. Лойиҳа амалга оширилгач, 63,4 минг нафар аҳоли оқова сув хизматларидан фойдаланиш имкониятига эга бўлади ва қамров даражаси 81 фоизга етказилади.
Шаҳрисабз шаҳрида эса оқова сув хизматлари қамрови ҳозирги 8 фоиздан 86 фоизга оширилади. Бугунги кунда мазкур хизматдан 19,6 минг нафар аҳоли фойдаланаётган бўлса, лойиҳа якунлангач, бу кўрсаткич 177 минг нафарга етади.
Умуман, Қашқадарё вилоятидаги лойиҳа доирасида Шаҳрисабз шаҳри ва Китоб тумани марказида жами 53 минг куб метр/сутка қувватга эга 2 та оқова сув тозалаш иншооти қурилади.
Шунингдек, 521,2 километр оқова сув тармоқлари қурилади ва реконструкция қилинади, 10 та насос станцияси барпо этилади.
Натижада 51 та маҳаллада истиқомат қилувчи 240,4 минг нафар аҳоли оқова сув хизматлари билан қамраб олинади.
Карманада қарийб 50 минг киши илк бор хизмат билан қамраб олинади
Навоий вилоятининг Кармана туманида ҳам оқова сув инфратузилмасини комплекс ривожлантириш кўзда тутилган.
Лойиҳа доирасида 9 800 куб метр/сутка қувватга эга 1 та оқова сув тозалаш иншооти, 161 километр оқова сув тармоқлари ва 5 та насос станцияси қурилади.
Натижада тумандаги 14 та маҳаллада яшовчи 54,9 минг нафар аҳолининг 49,4 минг нафари илк бор оқова сув хизматлари билан қамраб олинади. Ҳудудда хизматлар қамрови 90 фоизга етказилади.
Лойиҳалар қиймати 119 миллион евро
Мазкур лойиҳаларнинг умумий қиймати 119 миллион еврони ташкил этади. Ўзбекистон Республикаси ва Франция тараққиёт агентлиги ўртасидаги қарз битими 2022 йил 25 мартда имзоланган.
Бундан ташқари, лойиҳаларни қўллаб-қувватлаш мақсадида Европа Иттифоқи томонидан Франция тараққиёт агентлиги орқали 8,15 миллион евро миқдорида грант ажратилган.
Қурилиш ишларини амалга ошириш учун Франция тараққиёт агентлигининг харид йўриқномалари асосида икки босқичли тендер савдолари ўтказилган.
Тендер натижаларига кўра, Шаҳрисабз қурилиш пакети бўйича батафсил лойиҳани ишлаб чиқиш ва қурилиш ишларини амалга ошириш учун Alkatas Insaat ve Taahut A.S. (Туркия) ва MESMER-EAST LLC компаниялари, Навоий қурилиш пакети бўйича эса Alkatas Insaat ve Taahut A.S. (Туркия) компанияси ғолиб деб топилган.
Қурилиш ишларининг техник назоратини DOHWA Engineering Co., Ltd. (Корея) ва SAFEGE S.A.S. (Франция) компаниялари амалга ошириши кўзда тутилган.
Шаҳрисабз, Китоб ва Карманада амалга оширилаётган мазкур лойиҳалар замонавий оқова сув инфратузилмасини шакллантириш, аҳолининг коммунал хизматлардан фойдаланиш имкониятларини кенгайтириш ҳамда ҳудудларнинг санитария ва экологик ҳолатини яхшилашга хизмат қилади.
Имзоланган шартномалар лойиҳаларни бевосита амалга оширишнинг янги босқичини бошлаб беради.
