Бизнес ва тадбиркорлик олий мактаби, Сирдарё вилояти ҳокимлиги ҳамда «Wildberries» халқаро электрон тижорат платформаси ҳамкорлигида ташкил этилган семинар маҳаллий тадбиркорларни электрон тижорат имкониятларидан кенг фойдаланишга жалб этиш, миллий маҳсулотларни ички ва ташқи бозорларга олиб чиқиш ҳамда кичик ва ўрта бизнес субъектларининг экспорт салоҳиятини оширишга қаратилган.

Таъкидланганидек, Сирдарёда тадбиркорлик субъектлари сонининг ортиб бораётгани уларни замонавий савдо воситаларига ўқитиш ва рақамли каналлардан самарали фойдаланишини таъминлашни янада долзарб вазифага айлантирмоқда.

Хусусан, янги ташкил этилаётган тадбиркорлик субъектларининг рақамли савдо имкониятларидан фойдаланиши уларнинг бозорда тезроқ ўз ўрнини топишига хизмат қилади. Расмий статистикада Сирдарё вилоятида янги ташкил этилган тадбиркорлик субъектлари сони ҳам мунтазам ўсиб бораётгани қайд этилган.

Вилоятда бугунги кунда 10,6 мингдан ортиқ фаол тадбиркорлик субъекти мавжуд. Шундан 2,7 мингга яқин кичик тадбиркорлик субъекти Саноат йўналишида фаолият юритаётгани қувонарли ҳолдир. Ахборот ва алоқа соҳасидаги кичик тадбиркорлик субъектлари сони ҳам 220 тадан ошган. Бу рақамлар ҳудудда тадбиркорлик билан бир қаторда рақамли иқтисодиёт ва замонавий бизнес хизматларига бўлган эҳтиёж ҳам ортиб бораётганини кўрсатади.

Вилоятда ишлаб чиқарилаётган саноат, қишлоқ хўжалиги, озиқ-овқат, тўқимачилик, чарм-пойабзал, ҳунармандчилик ва бошқа маҳсулотларни электрон савдо платформалари орқали кенг истеъмолчиларга таклиф этиш муҳим аҳамият касб этади. Бу орқали маҳаллий тадбиркорлар нафақат вилоят ва республика бозорида, балки хорижий харидорлар орасида ҳам ўз маҳсулотларини тарғиб қилиш имкониятига эга бўлади.

Тадбир давомида иштирокчиларга электрон савдо платформаларида ишлашнинг амалий жиҳатлари бўйича батафсил маълумотлар берилди. Хусусан, онлайн дўкон очиш, маҳсулотларни электрон платформага жойлаштириш, маҳсулот карточкасини шакллантириш, харидорларни излаш ва улар билан мулоқот қилиш, буюртмаларни қабул қилиш ва етказиб бериш, логистика ҳамда тўлов тизимларидан фойдаланиш бўйича амалий билим ва кўникмалар тақдим этилди.

Семинарда бир қатор йўналишда фаолият юритадиган тадбиркорлар учун электрон савдони ривожлантириш имкониятлари муҳокама этилди.

Бизнес ва тадбиркорлик олий мактаби томонидан ҳудудларда ушбу йўналишда амалий семинарларни ташкил этишдан асосий мақсад ҳам тадбиркорларни электрон тижорат воситаларидан самарали фойдаланишга ўргатиш, уларнинг рақамли кўникмаларини ошириш ва замонавий бозор талабларига мослашишига кўмаклашишдан иборат.

Семинарда электрон дўкон ташкил этишдан тортиб, маҳсулотни жойлаштириш, буюртмаларни қабул қилиш, логистика ва тўлов жараёнларини йўлга қўйишгача бўлган босқичлар амалий мисоллар асосида тушунтирилди.

Электрон тижоратнинг яна бир муҳим жиҳати - логистика ва етказиб бериш хизматларини ривожлантиришдир. Сирдарёда ташиш ва сақлаш хизматлари соҳасида 600 дан ортиқ тадбиркорлик субъекти фаолият юритаётгани ҳам электрон савдо инфратузилмасини ривожлантириш учун муайян салоҳият мавжудлигини кўрсатади.

Айни пайтда вилоятда 500 га яқин ҳунарманд фаолият юритади. Уларнинг маҳсулотларини электрон савдо платформалари орқали ички ва ташқи бозорларга чиқариш ҳунармандлар учун янги харидорларни топиш, савдо ҳажмини ошириш ва маҳсулотларини кенг тарғиб қилишда муҳим имконият яратади.

Шу нуқтаи назардан, мазкур семинар нафақат тадбиркорларга электрон савдо платформаларида ишлашни ўргатиш, балки ҳудудда ишлаб чиқариш, савдо, логистика ва рақамли хизматларни ўзаро боғлаган ҳолда янги бизнес экотизимини шакллантиришга хизмат қилади.

 

Алишер Хажимуратов,

Вазирлар Махкамаси хузуридаги

Бизнес ва тадбиркорлик олий мактаби

Сирдарё вилояти худудий филиали рахбари.