Давлат хавфсизлик хизматининг Сирдарё вилояти бўйича бошқармаси, вилоят Ички ишлар ҳамда Божхона бошқармалари ходимлари ҳамкорлигида ўтказилган тезкор-қидирув тадбирлари давомида интернет наркодўконда “закладчик” ва қадоқловчи вазифасида ишловчи, 1996 ва 1998 йилларда туғилган эркак ва аёлнинг Гулистон шаҳридаги ижара асосида яшаган хонадони кўздан кечирилди. Натижада уйдаги иситиш мосламаси ичига 337 гр “гашиш” моддаси яшириб қўйилганлиги аниқланиб, ашёвий далил сифатида олинди.Шунингдек, улар ижарага олиб, омбор сифатида фойдаланган бошқа манзилда эса тарқатиш учун тайёрлаб қўйилган, жами 65 дона кичик бўлаклардан иборат, умумий оғирлиги 208 gr.ни ташкил этувчи “гашиш” моддаси борлиги маълум бўлди.

Давлат хавфсизлик хизмати, Ички ишлар ва Миллий гвардия ходимлари томонидан Навоий вилоятида ўтказилган тезкор тадбирда гиёҳвандлик воситаларини “закладка” усулида тарқатиб келган 3 нафар шахс Кармана тумани ҳудудида ушланиб, улардан 20 гр “Спайс” синтетик наркотик моддаси олинди.Тезкор суриштирув давомида мазкур шахслар Кармана туманидаги бир нечта “хуфия жой”ларга жами 542 гр “Спайс” моддасини яшириб қўйганликлари аниқланиб, ушбу гиёҳвандлик воситалари ҳам процессуал тартибда расмийлаштириб олинди.

ДХХ Навоий вилояти бўйича бошқармаси ва Ички ишлар органлари ходимлари ҳамкорлигида Самарқанд шаҳрида ўтказилган тезкор тадбирда парранда гўшти маҳсулотлари савдоси билан шуғулланувчи дўкон ишчиси жами 492 гр “опий” моддасини кичик бўлакларда қадоқлаб, келгусида сотиш мақсадида дўконда сақлаётганлиги фош этилди.

Давлат хавфсизлик хизматининг Қорақалпоғистон Республикаси бўйича бошқармаси ходимлари томонидан Ички ишлар ва Миллий гвардия билан ҳамкорликда Тўрткўл туманида ўтказилган тезкор тадбирда 1972 й.т. маҳаллий фуқаро ушланиб, унинг ёнида бўлган целлофан пакет холислар иштирокида кўздан кечирилганда 471 гр “марихуана” гиёҳвандлик воситаси борлиги аниқланди.Шунингдек, тезкор тадбир давом эттирилиб, унинг шериги ҳисобланган – 1964 й.т., муқаддам судланган шахснинг автомашинасидан 425 гр, яшаш хонадонидан эса 97 та гугурт қутисига жойлаштирилган, умумий оғирлиги 1 кг 175 gr.ni ташкил этувчи “марихуана” олинди.

Ҳозирда барча ҳолатлар юзасидан қонунбузарларга нисбатан жиноят ишлари қўзғатилиб, тергов ҳаракатлари олиб борилмоқда.