Бу ҳақда мамлакат Марказий сайлов ва референдумлар ўтказиш комиссиясига таяниб, 24.kg сайти маълум қилди.
Қайд этилишича, Жапаров президентликка номзод сифатида рўйхатдан ўтиш учун Марказий сайлов комиссиясига ариза топширган. У сайловда ўзини ўзи номзод қилиб кўрсатиш тартибида иштирок этмоқчи.
11 ноябрь ҳолатига кўра, Марказий сайлов комиссиясига президентликка номзодини илгари суриш бўйича еттита ариза келиб тушгани хабар қилинган. Аввалроқ Аймен Касенов, Азамат Эсенбеков, Сиймик Жапикеев, Акай Қидиров, Исхак Масалиев ва Бактибек Калмаматов ҳам сайловда қатнашиш ниятини билдирган.
Қирғизистонда президентликка номзодларни кўрсатиш жараёни 2026 йил 13 ноябрга қадар давом этади. Президентлик сайлови эса 2027 йил 27 январга белгиланган.
Маълумот учун, Садир Жапаров 2021 йил 10 январда ўтказилган муддатидан олдинги президентлик сайловида 79,2 фоиз овоз тўплаб, давлат раҳбари этиб сайланган ва ўша йилнинг 28 январида лавозимига киришган.
Жапаров сайланган вақтда амалда бўлган Конституцияга мувофиқ, президентлик ваколати олти йил этиб белгиланган эди. Бироқ 2021 йилда қабул қилинган янги Конституцияда президентлик муддати беш йилга қисқартирилиб, бир шахснинг ушбу лавозимни икки муддатдан ортиқ эгаллаши тақиқланган.
Қирғизистон Конституциявий суди Жапаровнинг олти йиллик амалдаги ваколат муддати биринчи президентлик муддати сифатида ҳисобланишини тасдиқлаган. Шу тариқа, у бўлажак сайловда иккинчи, беш йиллик президентлик муддати учун курашмоқда.
