Лойиҳа 50 минг аҳолига мўлжалланган бўлиб, унда замонавий турар жойлар, савдо ва бизнес марказлари, меҳмонхоналар ҳамда яшил ҳудудлар ташкил этилади.
Бу Президентнинг 2026 йил 5 ноябрдаги «Қорақалпоғистон Республикасида олиб борилаётган ислоҳотларни янада жадаллаштиришга қаратилган чора-тадбирлар тўғрисида»ги ПҚ–393-сон қарорида белгиланган.
Қарорга мувофиқ, «Nukus city» Нукус шаҳридаги Жолшилар маҳалласи Ашшикўл ҳудудида барпо этилади. Лойиҳада илғор архитектура ечимлари ва энергия тежамкор технологиялардан фойдаланилади.
Бунда «Янги Тошкент» лойиҳасини амалга ошириш тажрибаси инобатга олиниб, хорижий ташкилотлар тавсиялари асосида замонавий ва креатив бош режа ишлаб чиқилади.
Янги шаҳарчада «ақлли шаҳар» (smart city) ечимларини қамраб олган қуйидаги объектлар жойлаштирилади:
замонавий кўп квартирали турар жойлар;
савдо ва бизнес марказлари;
меҳмонхоналар;
парклар ва яшил ҳудудлар;
фавворалар ва спорт майдончалари;
ижтимоий соҳа муассасалари ҳамда бошқа инфратузилма объектлари.
Қорақалпоғистонни ривожлантириш бўйича 2027 йилга мўлжалланган мақсадлар
Қарор билан ҳудудни юқори ва барқарор иқтисодий-ижтимоий ривожлантириш бўйича қатор кўрсаткичлар белгиланди.
Хусусан, 2027 йилда:
ялпи ҳудудий маҳсулот ҳажмини 8 фоизга;
саноат маҳсулотлари ишлаб чиқаришни 7 фоизга;
бозор хизматларини 17 фоизга;
қишлоқ хўжалиги маҳсулотлари ишлаб чиқаришни 5 фоизга;
қурилиш ишларини 13 фоизга ошириш режалаштирилган.
Шунингдек, экспорт ҳажмини 550 миллион долларга, жами инвестициялар ҳажмини эса икки бараварга ошириб, 5 миллиард долларга етказиш белгиланган.
Бундан ташқари, биринчи босқичда паст даромадли 125 минг оиладаги 513 минг нафар аҳолини юқори даромадли иш ўринларига жойлаштириш кўзда тутилган.
