Шулар ҳақида ўйларканман,  “Иссиқ жонни иситмаси бўлади” деган гап ёдга тушади. Тўғри, хоҳлаймизми-йўқми, инсон борки, бемор бўлади. Соғ пайти соғлиқни қадрига етиш кераклигини билсак-да одатда аксариятимиз кўпроқ “иситма”миз чиққанидан кейин ҳаётимиз учун энг муҳим бўлган айни масалага эътибор қарата бошлаймиз.

Тиббиёт ривожланиб бораётган бугунги кунда давлатимиз томонидан аҳолини турли юқумли касалликлардан асраш,  сифатли ва тезкор тиббий хизмат кўрсатишни ташкил этиш, соҳа ходимлари билим ва малакасини ошириш ишларига жиддий эътибор қратилмоқда. Буни Самарқанд вилоятининг Ургут тумани мисолида ҳам кўриш мумкин.

Олти юз эллик мингга яқин аҳоли истиқомат қилаётган мазкур ҳудудда бугун олтмишга яқин тиббиёт муассасалари, жумладан, оилавий поликлиникалар фаолият олиб бормоқда. Жорий йил туманда 300 нафарга яқин соғлиқни сақлаш тизими ходими, жумладан, оилавий шифокорлар, тор соҳа мутахассислари, рентгенологлар, УТТ врачлари, акушер-гинеколог ва педиатрлар  ўз билим ва тажрибасини оширди. Самарқанд давлат тиббиёт университети билан  ҳамкорликда амалга оширилаётган бу борадаги ишлар давом этмоқда. 

Давлатимиз раҳбари Шавкат Мирзиёевнинг соғлиқни сақлаш тизимини ислоҳ қилишга оид фармон ва қарорлари, алоҳида топшириқлари ижроси  доирасида бу ердаги тиббиёт муассасалари фаолиятини ривожлантириш, уларни замонга мос равишда жиҳозлаш, беморлар, шунингдек, аҳолининг кўрикдан ўтиши учун қулай шарт-шароитлар яратиш масалаларига устувор вазифалардан бири сифатида қаралмоқда. Айни йўналишдаги ишлар ҳақида сўз борганда тумандаги 22 ва 51-сон оилавий поликлиникалар янгидан қурилиб фойдаланишга топширилгани, уларни жиҳозлашга қарийб 400 миллион сўм йўналтирилганини ҳам айтиш лозим.

Ургутдаги поликликалар ҳақида гап кетганда бу ердаги Баҳрин маҳалласидаги 21-оилавий поликлиника ҳақида ёзмасак бўлмайди. Бундан қарийб 55 йил аввал қурилган ушбу маскан капитал таъмирга муҳтож аҳволда, замонавий текширув аппаратлари ҳамда тиббий асбоб ва жиҳозлар етишмас, захдан деворлари моғарлаб кетган, хизмат кўрсатиш ҳам шунга яраша эди.

– Ўн уч минг нафардан зиёд аҳолига бирламчи тиббий ёрдам кўрсатиладиган пунктимизда юклама ниҳоятда катта, шароит эса абгор эди, –дейди мазкур муассаса мудири Сардор Луқмонов. – 2022-2024 йиллари кўп ҳаракат қилинди, аммо камчиликларни бартараф этишнинг иложи бўлмади. Ҳафсаласиз бўлиб юрган пайтларимиз поликлиникамизга 2025 йил декабрь ойида Ўзбекистон Республикаси Президенти Администрацияси раҳбари Саида Мирзиёеванинг ташриф буюриши мавжуд муаммоларимизнинг барчаси ечилишига йўл очди. Топшириқларига биноан қисқа вақт ичида биномиз янгидан қуриб битказилди. Энг замонавий жиҳозлар, тиббий асбоб-ускуналар, жумладан, рентген ва UTT аппаратлари билан таъминланди. Бу ерда йигирма беш ўринли туғруқ бўлими ҳамда тез тиббий ёрдам шохобчаси ҳам ташкил этилди. Биласизми, Саида Шавкатовнанинг бу ерга келиши минглаб аҳолини қийнаб келаётган камчилик ва ноқулайликларга нуқта қўйди. Бундан ғоят мамнун онахон-у отахонларимиз у кишининг ҳақларига дуолар қилиб туради.

Ҳар куни ўртача 300 киши мурожаат қилаётган мазкур муассасада аёллар ва эркакларнинг стационар шароитда даволаниши учун алоҳида хоналар, физотерапия муолажалари ташкил қилинган.

Х. Салимов,

Yuz.uz мухбири