Қонун лойиҳаси парламент мажлисида биринчи ўқишда кўриб чиқилди. Ҳужжат судьяларнинг мақомини алоҳида қонун даражасида белгилаш ва суд ҳокимияти мустақиллигини янада мустаҳкамлашга қаратилган.
Лойиҳага кўра, судьялар ва халқ маслаҳатчилари учун ёш цензини 35 ёшдан 30 ёшга тушириш таклиф этилмоқда.
Шунингдек, судьяни дастлаб 5 йилга, кейин эса муддатсиз даврга тайинлаш тартибини жорий этиш кўзда тутилмоқда. Судья, суд раиси ва раис ўринбосари лавозимларига қўйиладиган талаблар ҳам кучайтирилиши белгиланган.
Қонун лойиҳасида судьялар ва уларнинг оила аъзоларини ижтимоий ҳимоя қилишга оид нормалар ҳам ўз аксини топган.
Яна бир янгилик — миллий қонунчиликка «истеъфодаги судья» институти киритилмоқда. Унга бошқа ҳуқуқлар қаторида профессионал медиаторлик фаолияти билан шуғулланиш ҳуқуқи берилиши таклиф этилган.
Бундан ташқари, Олий суд ва қуйи судлар аппаратлари фаолиятини самарали ташкил этишга қаратилган нормалар ҳам назарда тутилмоқда.
Муҳокамаларда депутатлар судьяларнинг ҳуқуқий ва ижтимоий ҳимоясини кучайтириш ҳамда суд ҳокимияти мустақиллигини таъминлашда қонун лойиҳасининг аҳамиятини таъкидлади.
Мажлис якунида қонун лойиҳаси биринчи ўқишда қабул қилинди. Ҳужжат иккинчи ўқишга тайёрланиши жараёнида депутатлар билдирган таклиф ва тавсиялар асосида такомиллаштирилади.
