Мазкур ташкил этилган тадбирда давлат идоралари, халқаро ташкилотлар, таълим муассасалари ва технология соҳаси вакиллари ҳамда ОАВ ходимлари иштирок этди.
Дастур Stanford University Human-Centered Artificial Intelligence (HAI), OpenAI Academy ва Silkroad Innovation Hub томонидан Ўзбекистон Республикаси Рақамли технологиялар вазирлиги, IT Park Uzbekistan, Осиё тараққиёт банки ҳамда Ёшлар ишлари агентлиги кўмагида амалга оширилди. “AI Leaders 2026” дастури ташкилотларда стратегик қарорлар қабул қилиш ва рақамли трансформация жараёнларини бошқаришда масъул бўлган раҳбарлар, топ-менежерлар ҳамда мутахассисларни бирлаштирди.
Лойиҳанинг асосий мақсади иштирокчиларнинг сунъий интеллект соҳасидаги билим ва амалий кўникмаларини ошириш, давлат бошқаруви, молия, таълим, технология ва бошқа тармоқларда замонавий AI ечимларини жорий этишга кўмаклашишдан иборат бўлди.
Тақдирлаш маросимида Ўзбекистон Республикаси Рақамли технологиялар вазирининг биринчи ўринбосари Айюбхон Султонов, Осиё тараққиёт банкининг Ўзбекистондаги ваколатхонаси раҳбарияти вакиллари ҳамда Silkroad Innovation Hub асосчиси ва бош директори Асе́т Абдуалиев иштирок этди.
Тадбир қатнашчилари сунъий интеллект технологиялари иқтисодий тараққиётнинг муҳим драйверларидан бирига айланаётганини, шу боис мамлакатда рақамли трансформация жараёнларини бошқара оладиган янги авлод раҳбарларини тайёрлаш долзарб аҳамият касб этишини таъкидладилар.
Жорий йилги дастурда Озарбайжон, Қозоғистон, Қирғизистон, Ўзбекистон, Тожикистон, Туркия, Қатар, Бирлашган Араб Амирликлари ва Мўғулистондан 150 дан ортиқ ташкилотнинг 800 нафардан зиёд раҳбар ва мутахассислари иштирок этди. Ўзбекистондан эса давлат органлари, молия институтлари, технология компаниялари, таълим муассасалари ва йирик корхоналарни қамраб олган 25 дан ортиқ ташкилотнинг 120 нафардан зиёд раҳбар ва қарор қабул қилувчи вакиллари қатнашди. Дастур Ўзбекистон Республикаси Президентининг мамлакатда сунъий интеллект технологияларини ривожлантириш, соҳада юқори малакали кадрлар тайёрлаш ва халқаро ҳамкорликни кенгайтиришга қаратилган вазифаларини амалга оширишга ҳам хизмат қилмоқда.
Лойиҳанинг академик раҳбари сифатида Stanford HAI профессори, Google Researchнинг собиқ директори ва сунъий интеллект бўйича машҳур мутахассис Питер Норвиг фаолият юритди. Унинг раҳбарлигида ўқув материаллари минтақа эҳтиёжларига мослаштирилди. Машғулотларга сунъий интеллект соҳасидаги 15 нафардан ортиқ халқаро экспертлари жалб этилди. Саккиз ҳафта давом этган таълим жараёнида иштирокчилар 45 соатдан ортиқ ўқув дастурини ўзлаштирди. Унда Stanford HAI маърузалари, OpenAI Academy амалий машғулотлари, соҳавий воркшоплар ва стратегик маслаҳатлар ўрин олди.
Шунингдек, ташкилотларда сунъий интеллектни жорий этишга бағишланган 240 дан ортиқ стратегик сессия ва 120 соатдан зиёд индивидуал менторлик учрашувлари ўтказилди. Банк соҳаси, давлат бошқаруви, таълим ва бошқа тармоқлар учун AI-агентлар ишлаб чиқиш бўйича амалий машғулотларга алоҳида эътибор қаратилди.
— “AI Leaders 2026” дастури мамлакатимизда сунъий интеллект экотизимини шакллантириш ва раҳбар кадрларнинг замонавий технологиялар бўйича компетенцияларини оширишда муҳим аҳамият касб этади. Бундай ташаббуслар маҳаллий мутахассисларга жаҳоннинг етакчи таълим ва технология марказлари тажрибасини ўрганиш имконини беради. Шу билан бирга, Ўзбекистоннинг халқаро ҳамкорлик алоқаларини мустаҳкамлаш ва инновацион иқтисодиётни ривожлантиришга хизмат қилади деди, – IT Park Uzbekistan халқаро алоқалар бўлими бошлиғи Исмоилжон Исамухамедов.
Тақдирлаш маросимида дастурни муваффақиятли тамомлаган иштирокчиларга Stanford University HAI ва OpenAI Academy сертификатлари топширилди.
Шунингдек, улар Марказий Евроосиёда рақамли трансформация ва сунъий интеллектни жорий этиш билан шуғулланувчи раҳбарларни бирлаштирувчи йирик профессионал ҳамжамият — AI Leaders Community сафига қабул қилинди. “AI Leaders 2026” нафақат таълим дастури, балки минтақада сунъий интеллект соҳасидаги ҳамкорликни мустаҳкамлаш, инновацион ғояларни амалиётга татбиқ этиш ва рақамли иқтисодиёт учун янги авлод раҳбарларини шакллантиришга қаратилган муҳим майдонга айланди. Тошкентда ўтказилган мазкур битирув маросими эса Ўзбекистоннинг сунъий интеллект соҳасидаги халқаро ҳамкорлик ва билимлар алмашинуви марказларидан бирига айланаётганини яна бир бор намоён этди.
Зулхумор Акбарова
