Ҳодиса оқибатида икки нафар йўловчи енгил тан жароҳати олди. Уларга зудлик билан зарур тиббий ёрдам кўрсатилди.
Айни пайтда корхона мутахассислари тегишли ташкилотлар билан биргаликда иншоот конструкцияларини визуал ва техник кўрикдан ўтказмоқда. Дастлабки маълумотларга кўра, шифтнинг декоратив қисми шикастланган. Ҳодиса сабабларини аниқлаш мақсадида махсус комиссия тузилган, айни вақтда тиклаш ишлари олиб борилмоқда.
Тошкент шаҳар ҳокимлиги илк дақиқаларданоқ метрополитен раҳбарияти билан алоқада бўлиб, аҳоли хавфсизлиги ва қулайлигини таъминлаш учун зарур кўмакни кўрсатмоқда.
Бекатга туташ ҳудудда Тошкент шаҳар ИИББ Йўл ҳаракати хавфсизлиги бошқармаси ходимлари транспорт ҳаракатини тартибга солиб, хавфсизликни таъминламоқда.
Текширув ва таъмирлаш ишлари давомида Тошкент шаҳар Транспорт ва йўл-транспорт инфратузилмасини ривожлантириш бош бошқармаси томонидан "Тошшаҳартрансхизмат" АЖ билан ҳамкорликда қўшимча автобуслар ҳаракати йўлга қўйилди:
— 13 ва 14-бекатлар оралиғида 4 та автобус;
— 13 ва 12-бекатлар оралиғида 4 та автобус.
Ҳаракатланиш интервали 3 дақиқани ташкил этади.
Шунингдек, воқеа жойида шаҳар ва фавқулодда хизматларнинг фаолияти таъминланиб, йўловчиларни жамоат транспорти ҳаракатидаги ўзгаришлар ҳақида тезкор хабардор қилиш йўлга қўйилган.
"Тошкент метрополитени" ДУК юзага келган вақтинчалик ноқулайликлар учун йўловчилардан узр сўради.
Тошкент шаҳар ҳокимлиги аҳолининг хавфсиз ва узлуксиз ҳаракатланишини таъминлаш юзасидан вазиятни назорат қилишда давом этмоқда.
