Мазкур ҳолат юзасидан Тошкент шаҳар Экология ва иқлим ўзгариши бош бошқармаси бошлиғи А. Расулов бошчилигида тезкор ишчи гуруҳ тузилиб, воқеа жойига чиқилди. Ишчи гуруҳ таркибига бошқарманинг Атроф-муҳит мониторинги, иқлим ўзгаришига мослашиш ва гидрометеорология йўналишидаги таҳлилий лаборатория мутахассислари ҳамда Яккасарой тумани экология назорати инспекцияси давлат инспекторлари жалб этилди.
Жойида ўтказилган ўрганишлар давомида қурилиш ишлари вақтида эҳтиётсизлик оқибатида оқова сув қувурига шикаст етгани ва бунинг натижасида оқова сувларни Салар каналига тўғридан-тўғри ташлаш ҳолати аниқланди.
Ҳолат юзасидан бошқарма таҳлилий лабораторияси мутахассислари томонидан канал сувидан белгиланган тартибда намуналар олиниб, лаборатория таҳлилига юборилди.
Таҳлил натижалари ҳамда ўрганиш якунларига кўра, атроф-муҳитни муҳофаза қилиш талабларига риоя этилмагани юзасидан қонунчиликда белгиланган тартибда тегишли чоралар кўрилади. Қўшимча маълумотлар ўрганиш ишлари якунига кўра тақдим этилади.
