Анжуманнинг асосий кун тартиби учта йўналишни қамрайди: халқаро конференция, панел сессиялар ва туроператорлар ўртасидаги икки босқичли Б2Б нетворкинг учрашувлари.
Айнан шу учрашувларда туристик хизматларни бевосита сотувчи ва хорижий бозорларда тарғиб қилувчи компаниялар билан амалий ҳамкорлик алоқалари йўлга қўйилади.
Тадбирнинг Ўзбекистон учун стратегик аҳамияти шундаки, у янги бозорларга чиқиш имконини беради. Хусусан, Канада, Буюк Британия ва Европадаги харид қобилияти юқори сегмент — асли осиёлик мусулмонлар диаспораси учун турлар ташкил этувчи компаниялар билан тўғридан-тўғри алоқа ўрнатилади. Бу эса мамлакатимизга премиум ва ҳашаматли хизматларга тайёр, тўловга қодир туристларни жалб этиш йўлини очади.
Иштирокчилар учун Хоразм, Самарқанд ва Бухоро вилоятлари бўйлаб экскурсиялар ва қўшимча бизнес учрашувлар режалаштирилган. Шу орқали хорижий шериклар Ўзбекистонда ривожланиб бораётган тоғ туризми, экотуризм, гастрономик ва этнографик туризм йўналишлари билан бевосита танишади.
Туризм қўмитаси ва "Трип Груп" туристик ташкилоти ҳамкорлигидаги анжуман дунёнинг 20 дан ортиқ мамлакатидан 100 дан ортиқ соҳа вакилини пойтахтга жамлайди. Илгари Туркия, Миср, Ветнам ва Танзанияда ўтказилган тадбирга бу йил илк бор Ўзбекистон мезбонлик қилмоқда.
Саммитга АҚШ, Канада, Янги Зеландия, шунингдек, Европа ва Осиёнинг етакчи давлатларидан йирик туроператорлар ташриф буюради.
