Тантанали очилиш маросимида Тошкент вилояти ҳокими Зойир Мирзаев, «Ўзбекистон темир йўллари» АЖ бошқаруви раиси Зуфар Нарзуллаев, вилоят ва туман ҳокимликлари масъуллари, темир йўл соҳаси вакиллари, нуронийлар, ёшлар ҳамда кенг жамоатчилик иштирок этди.
Мазкур лойиҳа ҳудуд аҳолиси учун йиллар давомида долзарб бўлиб келган транспорт муаммосини ҳал этишга қаратилган. Авваллари поездлар ҳаракати сабабли темир йўл кесишмасида автомобиллар ва пиёдалар узоқ вақт кутиб қолар, бу эса ҳаракат хавфсизлигига ҳам таъсир кўрсатар эди.
«Ўзбекистон темир йўллари» АЖ томонидан «Собир Раҳимов — Ўртаовул» бекатлари оралиғидаги 3384-километр, ПК-2 нуқтасида мавжуд темир йўл кесишмаси ўрнида янги йўл ўтказгич барпо этилди.
Қурилиш доирасида узунлиги 23,6 метр бўлган бир дона икки йўлли темир йўл кўприги қурилди. Шунингдек, темир йўл излари ўз жойига қайтарилиб, 1200 метр узунликдаги айланма темир йўл ва автомобиль йўли барпо этилди.
Тадбирда вилоят ҳокими янги йўл ўтказгич аҳоли учун қулайлик яратиш, ҳаракат хавфсизлигини таъминлаш ва вақтни тежашда муҳим аҳамиятга эга эканини таъкидлади.
Маросимда рамзий қизил лента кесилиб, янги йўл ўтказгич фойдаланишга топширилди. У орқали илк автомобиллар ҳаракати ҳам йўлга қўйилди.
Янги инфратузилма Зангиота тумани аҳолиси ва ушбу ҳудуд орқали ҳаракатланувчи ҳайдовчилар учун қулайлик яратиши, темир йўл кесишмасидаги тирбандликларни камайтириши ҳамда транспорт ҳаракати хавфсизлигини ошириши кутилмоқда.
