Бу ҳақда Ўзбекистон Республикаси Экология ва иқлим ўзгариши миллий қўмитаси маълум қилди.
Экология ва иқлим ўзгариши миллий қўмитаси раиси, Экополиция бошлиғи Азиз Абдуҳакимов раислигида ўтказилган кенгайтирилган йиғилишда вилоятда атроф-муҳитни муҳофаза қилиш ва экологик назоратни ташкил этишда йўл қўйилган камчиликлар танқидий муҳокама қилинди.
Йиғилишда экологик назоратнинг сустлиги, хўжалик юритувчи субъектлар фаолияти устидан назорат етарли даражада ташкил этилмагани, экологик экспертиза хулосасисиз ҳамда дарёларни муҳофаза қилиш зоналарида рухсатсиз фаолият юритаётган объектларга нисбатан таъсирчан чоралар кўрилмагани қайд этилди.
Шунингдек, Чирчиқ дарёси ўзанида қум-шағал аралашмасининг ноқонуний қазиб олиниши ва муҳофаза ҳудудларига чиқиндилар ташланиши ҳолатлари бўйича назорат самарасиз экани таъкидланди. Ҳар бир туман ва шаҳар фаолияти алоҳида таҳлил қилиниб, экологик назоратни ташкил этишдаги сусткашлик ва масъулиятсизлик ҳолатлари кўрсатиб ўтилди.
Йўл қўйилган камчиликлар учун Тошкент вилояти Экополицияси бошлиғи ўринбосари ҳамда саккизта туман ва шаҳар бўлимлари бошлиқлари лавозимидан озод этилди.
Шу билан бирга, Тошкент вилояти Экология бош бошқармасига аниқланган камчиликларни қисқа муддатда бартараф этиш бўйича аниқ вазифалар юклатилди.
Қорақалпоғистон Республикаси Экология қўмитаси, барча вилоятлар ва Тошкент шаҳар бош бошқармаларига ҳам Тошкент вилояти тажрибасидан тегишли хулоса чиқариш, назорат самарадорлигини ошириш ва аҳоли ўртасида экологик маданиятни юксалтириш юзасидан топшириқлар берилди.
Қўмита маълумотига кўра, экологик назорат республика бўйлаб кучайтирилган бўлиб, бу соҳадаги ҳар қандай масъулиятсизликка нисбатан кескин чоралар қўлланилади.
