Бу ҳақда Тошкент шаҳар ҳокими Шавкат Умрзоқов ЎзАга берган интервьюсида маълум қилди.
Унинг таъкидлашича, ҳозирги бозорлар кўриниши ва бизнес модели жиҳатидан замонавий талабларга тўлиқ жавоб бермайди.
Инвесторлар олдига учта қатъий шарт қўйилади. Улар белгиланган ҳажмдаги савдо расталарини замонавий шаклда қуриб, давлатга топшириши, мавжуд тадбиркорларнинг иш ўринларини сақлаши ва етарли сиғимда автотураргоҳ барпо этиши керак.
Инвесторларга фақат самарасиз фойдаланилаётган майдонларда савдо, хизмат кўрсатиш ва кўнгилочар объектлар қуриш ҳуқуқи берилади.
Шавкат Умрзоқов «Экобозор» тажрибаси ушбу модел ишлашини кўрсатганини таъкидлади.
У халқаро тажрибага ҳам тўхталиб, Роттердамдаги Markthal ва Лиссабондаги Time Out Market каби лойиҳаларда тарихий бозор функцияси сақланган ҳолда, улар шаҳарнинг замонавий ва гавжум жамоат маконларига айланганини мисол келтирди.
«Бизнинг бозорларимиз ҳам миллий муҳитини сақлаган ҳолда айнан шундай ривожланиши керак», — деди шаҳар ҳокими.
Шу тариқа, бозорларни модернизация қилишдан асосий мақсад уларнинг фаолиятини тўхтатиш эмас, балки мавжуд тадбиркорлик фаолиятини сақлаган ҳолда савдо ва хизмат кўрсатиш сифатини ошириш, шаҳар муҳитини яхшилаш ва самарасиз фойдаланилаётган ҳудудлардан унумли фойдаланишдан иборат.
