27 октябрь куни Тошкент шаҳар Ёшлар марказида Ўзбекистон ва Туркия ҳамкорлигида ташкил этилган мазкур марказнинг тантанали очилиш маросими бўлиб ўтди.
Тадбирда Ёшлар ишлари агентлиги директори Алишер Саъдуллаев, Тошкент шаҳар ҳокими ўринбосари Дурдона Раҳимова, Туркия Технология жамоаси жамғармаси бошқарув кенгаши раиси Элван Кузужу Ҳидир, Туркиянинг Ўзбекистондаги элчиси Уфуқ Улутас, шунингдек, талабалар, фаол ёшлар ва жамоатчилик вакиллари иштирок этди.
Марказ ёшларга замонавий билим ва кўникмаларни эгаллаш, илмий-техник йўналишларда амалий тажриба орттириш имконини беради.
Бу ерда робототехника, сунъий интеллект, авиация, космик технологиялар ва аниқ фанлар бўйича амалий билимлар берилади. Шунингдек, ёшлар хорижий тилларни интерактив усулларда ўрганишлари мумкин.
«Билим Тошкент» маркази Ёшлар ишлари агентлиги, Тошкент шаҳар ҳокимлиги, «Беш ташаббус лойиҳа офиси» ҳамда Туркия Технология жамоаси жамғармаси ҳамкорлигида ташкил этилган.
Лойиҳанинг асосий мақсади ёшларнинг илм-фан ва инновацияларга қизиқишини ошириш, уларнинг салоҳиятини ривожлантириш ҳамда халқаро таълим ва меҳнат бозорида рақобатбардош мутахассис бўлиб етишишига кўмаклашишдан иборат.
