Текширувлар давомида 722 та объект ўрганилиб, қоидабузарликлар аниқланган 516 та ҳолат бўйича жами 286 миллион сўм маъмурий жарима қўлланилди.
Ўрганилган объектларнинг 602 таси иссиқхона, 56 таси саноат ва ишлаб чиқариш корхонаси, 26 таси қурилиш майдони ҳамда 38 таси бошқа объектлар ҳиссасига тўғри келади. Шунингдек, экологик талабларни бузгани учун 2 та иссиқхона ва 1 та қурилиш объектининг фаолияти тўхтатилди.
Рейдларда иссиқхоналарда кўмир ёқишда фильтрлардан талаб даражасида фойдаланмаслик ва ўсимлик қолдиқларини ёқиш ҳолатлари аниқланган. Хусусан, Тошкент туманидаги «E.» ва «M.I.A.» корхоналарида носоз фильтрлар билан кўмир ёқилган. Фуқаро М.га тегишли иссиқхонада эса кўмир фильтрсиз ёқилгани маълум бўлди. Ушбу иссиқхона фаолияти тўхтатилди.
Шу каби экологик талаббузарликлар Мирзо Улуғбек ва Сергели туманларида ҳам қайд этилди. Иссиқхона эгаларига Вазирлар Маҳкамасининг 2026 йил 22 октябрдаги 586-сон қарори талаблари тушунтирилиб, уларга мажбурий кўрсатмалар берилди.
Қурилиш майдонларидаги текширувларда эса 9 миллиард 96 миллион сўм компенсация тўлови ҳисобланди. Жумладан, «N.H.P» қурилиш майдонида чангни бостириш ва ғилдиракларни ювиш мосламалари ўрнатилмагани, 87 289 куб метр тупроқ белгиланган тартибга риоя қилмасдан жойлаштирилгани аниқланди. «B. S.» МЧЖга чанг кўтарилишининг олдини олмагани учун маъмурий жарима қўлланилди.
Айни пайтда экологик талабларга риоя этилишини назорат қилиш бўйича рейдлар 24/7 режимида давом эттирилмоқда.
