Аввал Мустақиллик кўчасидан Оққўрғон кўчасига тўғридан-тўғри чапга бурилиш мумкин эди. Бироқ транспорт оқимининг ортиши, айниқса тирбанд вақтларда, ушбу манёвр чорраҳа ҳудудида транспорт воситалари тўпланиб қолишига сабаб бўлган.
Шу боис Мустақиллик кўчасидан Оққўрғон кўчасига чапга бурилиш чекланди.
Эндиликда Оққўрғон кўчасига ҳаракатланмоқчи бўлган ҳайдовчилар Мустақиллик кўчаси бўйлаб тўғри ҳаракатланиб, Паркент кўчасига бурилади. Шундан сўнг Мустақиллик кўчасига қайта чиқиб, ўнгга бурилиш орқали Оққўрғон кўчасига киришлари мумкин.
Шунингдек, Паркент кўчасидан Мустақиллик кўчасига чиқувчи транспорт воситалари учун ҳам янги ҳаракатланиш имконияти яратилди. Ҳайдовчилар янги ташкил этилган икки томонлама ҳаракат йўлаги орқали Мустақиллик кўчасига қўшилишлари мумкин.
Янги ҳаракатланиш тартиби чорраҳа ҳудудида транспорт воситалари тўпланиб қолишини камайтириш, транспорт оқимининг узлуксиз ҳаракатланишини таъминлаш ва йўл ҳаракати хавфсизлигини оширишга қаратилган.
Ҳайдовчилардан ҳудудда ўрнатилган йўл белгилари ва янги ҳаракатланиш тартибига риоя қилиш сўралди.
