Бу ҳақда Тошкент шаҳар ҳокимлиги ахборот хизмати маълум қилди. 

Очилиш маросими тадбир доирасида Ўзбекистонда ишлаб чиқарилиши бошланган бренднинг илк модели — JAC M3 автомобилини йиғиш линияси расман ишга туширилди.

“JAC Motors Toshkent” МЧЖ Хитойнинг JAC Motors компанияси ҳамда Toshkent invest kompaniyasi АЖ ҳамкорлигида қўшма корхона шаклида ташкил этилди. Завод ички ёнув двигателли, гибрид ва электромобиллар ишлаб чиқаришга ихтисослашган.

Лойиҳанинг умумий қиймати 135 миллион АҚШ долларини ташкил этиб, у 30 гектар майдонда икки босқичда амалга оширилади.

Биринчи босқичда 35 миллион доллар инвестиция ўзлаштирилиб, йилига 10 минг дона автомобиль ишлаб чиқариш қувватига эга SKD заводи фаолияти йўлга қўйилди. Шунингдек, 100 та янги иш ўрни яратилди.

Иккинчи босқичда эса тўлиқ ишлаб чиқариш циклига эга CKD заводини барпо этиш, йиллик қувватни 30 минг дона автомобильга етказиш ҳамда қарийб 1000 та қўшимча иш ўрни яратиш режалаштирилган.

Келгусида Тошкентда JAC M4, Sunray, JS8, RF8, T8 ва T9 русумли автомобилларни ишлаб чиқариш йўлга қўйилиши кўзда тутилмоқда.

Мутасаддиларга кўра, мазкур лойиҳа пойтахтда юқори технологияли саноат тармоқларини ривожлантириш, автомобиль бозорида рақобатни кучайтириш, аҳолига сифатли ва ҳамёнбоп транспорт воситаларини тақдим этиш ҳамда экспортбоп маҳсулотлар ишлаб чиқаришга хизмат қилади.