Мазкур коридорни ташкил этиш ишлари бир неча босқичда амалга оширилмоқда. Айни пайтда Амир Темур шоҳ кўчасида BRT инфратузилмасини барпо этиш бошланган, Янги Сергели кўчасида эса дастлабки тайёргарлик ишлари олиб борилмоқда.
Лойиҳа доирасидаги ишлар қуйидаги кўчаларни қамраб олади:
Шота Руставели кўчаси — 6,5 километр. Бу ерда BRT тизими 2025 йилдан буён фаолият юритмоқда.
Шаҳрисабз кўчаси — 3,2 километр. Ушбу йўналишнинг 2,2 километри фойдаланишга топширилган, қолган қисмида ишлар давом этмоқда.
Амир Темур шоҳ кўчаси — 7,6 километр. Инфратузилмани ташкил этиш ишлари бошланган.
Янги Сергели кўчаси — 5,5 километр. Дастлабки тайёргарлик ишлари олиб борилмоқда.
Коридор бўйлаб автобуслар учун алоҳида ҳаракатланиш йўлаклари, замонавий бекатлар ва йўловчи платформалари ташкил этилади. Шунингдек, светофорлар янгиланиб, кейинги босқичда «яшил тўлқин» тизими жорий этилади.
Бундан ташқари, автобуслар сонини кўпайтириш, йўналишлар ва қатнов жадвалларини мақбуллаштириш, кўча ёритиш тизимини янгилаш режалаштирилган. Бекатларга электрон таблолар, видеокузатув камералари ва SOS тугмалари ҳам ўрнатилади.
Транспорт вазирлиги маълумотларига кўра, Шота Руставели кўчасида 2026 йилдаги кўрсаткичлар 2023 йил билан таққосланганда, автобусларнинг ўртача ҳаракат тезлиги 45 фоизга, енгил автомобилларники эса 18 фоизга ошган. Жамоат транспортидан фойдаланувчилар сони кунига 8 минг нафарга кўпайган.
Маълумот учун, BRT — автобусларнинг алоҳида йўлакларда тезкор ва узлуксиз ҳаракатланишини таъминлайдиган жамоат транспорти тизими. Унинг асосий мақсади йўловчиларнинг манзилга етиб бориш вақтини қисқартириш, жамоат транспорти жозибадорлигини ошириш ва йўллардаги тирбандликни камайтиришдан иборат.
