Бу ҳақда Транспорт вазирлиги маълум қилди.
«Тошкент шаҳар йўловчи ташишни мониторинг ва назорат қилиш» давлат муассасаси назоратчилари автобусларда электрон тўловларни текширмоқда. Қоидабузарлик аниқланган ҳолатларда белгиланган тартибда маъмурий баённомалар расмийлаштириляпти. Йўловчиларга эса электрон тўлов тизимидан фойдаланиш ва йўл ҳақини ўз вақтида тўлаш тартиби тушунтирилмоқда.
Рақамларга эътибор қаратсак, 2026 йилнинг январь–октябрь ойларида Маъмурий жавобгарлик тўғрисидаги кодекснинг 144-моддаси бўйича 138 780 та маъмурий баённома тузилган. Уларнинг 25 596 таси октябрь ойига тўғри келади.
Ноябрь ойининг дастлабки тўққиз кунида эса яна 7 757 та баённома расмийлаштирилган. Бу бир кунда ўртача 862 та ҳолат қайд этилганини англатади.
Шу тариқа, йил бошидан 9 ноябрга қадар расмийлаштирилган баённомалар сони 146 537 тага етган.
Эслатиб ўтамиз, жамоат транспортида йўл ҳақини электрон шаклда тўлаш тизими тўловлар шаффофлигини таъминлаш ва яширин иқтисодиётни қисқартиришга хизмат қилади. Транспорт вазирлиги йўловчиларни белгиланган қоидаларга амал қилишга ҳамда йўл ҳақини ўз вақтида тўлашга чақирди.
