Тошкент шаҳар транспорт ва йўл-транспорт инфратузилмасини ривожлантириш бош бошқармаси ижтимоий тармоқларда автобуслар ҳаракат интерваллари бузилаётгани юзасидан билдирилган эътирозларга муносабат билдирди.
Маълум қилинишича, айни вақтда пойтахтнинг Шаҳрисабз, Амир Темур шоҳ кўчаси ҳамда Янги Сергели кўчаларида жамоат транспорти учун алоҳида йўлаклар (BRT) ташкил этиш ва капитал таъмирлаш ишлари олиб борилмоқда.
Жумладан:
Шаҳрисабз кўчасида — 1 км;
Амир Темур шоҳ кўчасида — 2,73 км;
Янги Сергели кўчасида — 1,36 км узунликда қурилиш-монтаж ишлари амалга оширилмоқда.
Ушбу ишлар доирасида жами 5,09 километр йўлда қурилиш ва таъмирлаш ишлари олиб борилмоқда.
Қайд этилишича, айрим йўл участкаларида транспорт ҳаракатига вақтинчалик чекловлар киритилгани шаҳарнинг қатор кўчаларида тирбандликларнинг ортишига сабаб бўлмоқда. Айниқса, эрталабки ва кечки тиғиз вақтларда автобусларнинг белгиланган жадвал ва ҳаракат интервалларига риоя қилиши қийинлашмоқда.
Бош бошқарма маълумотига кўра, қурилиш-монтаж ишлари якунланиб, йўлларда транспорт ҳаракати тиклангач, тирбандликлар камаяди ва автобуслар ҳаракат интерваллари белгиланган жадвал асосида барқарорлашади.
