Бу ҳақда Ички ишлар вазирлигида аҳолини суюлтирилган газ билан узлуксиз ва сифатли таъминлаш масалаларига бағишланган йиғилишда маълум қилинди.
Тадбирда ички ишлар вазири генерал-лейтенант Азиз Тошпўлатов, вазир ўринбосарлари, ҳудудий хизматлар раҳбарлари, «Ҳудудгазтаъминот» АЖ ва «LPG-Trade» МЧЖ масъуллари иштирок этди.
Вазирлик маълумотига кўра, ўтган бир ой давомида кўмир маҳсулотини ноқонуний сақлаш ва сотиш билан боғлиқ 16 та ҳолат ҳам аниқланган. Натижада 333 тонна 540 килограмм кўмир мусодара қилиниб, аҳоли эҳтиёжлари учун етказилган.
Шунингдек, жорий йил октябрь ойида Самарқанд вилоятидаги «Пастдарғомтумангаз» газ таъминоти корхонаси ходимлари аҳоли учун ажратилган газни талон-торож қилаётгани аниқланган.
Тезкор-қидирув тадбирлари давомида ходимларнинг олдиндан жиноий тил бириктириб, махсус транспорт воситалари ёрдамида маиший газ баллонларидаги углеводород газини талон-торож қилгани маълум бўлган. Ҳолат бўйича қиймати 32 миллион сўмлик жами 3 тонна 100 килограмм газ маҳсулоти мусодара қилинган.
Мазкур ҳолат юзасидан Самарқанд вилояти ИИБ ҳузуридаги Тергов бошқармаси томонидан корхона ходимларига нисбатан Жиноят кодексининг 167-моддаси 2-қисми «в» банди билан жиноят иши қўзғатилган.
Йиғилишда куз-қиш мавсумида аҳоли ва ижтимоий соҳа объектларини энергетика ресурслари билан барқарор таъминлаш, газ баллонларини белгиланган график асосида етказиб бериш, маҳсулотлар тақсимотида шаффофликни таъминлаш масалалари ҳам муҳокама қилинди.
Масъулларга газ ва кўмирни ташиш, сақлаш ҳамда аҳолига етказиб бериш жараёнларини қатъий назорат қилиш, таъминотдаги узилишлар сабабларини аниқлаш, асоссиз тўловлар ва маҳсулотларни талон-торож қилиш ҳолатларининг олдини олиш топширилди.
