Экология ва иқлим ўзгариши миллий қўмитаси Экoполиция ходимлари фуқаролар мурожаатлари асосида корхона фаолиятини ўрганди.
Текширувда қурилиш майдонидан чиқиш жойида ғилдирак ювиш постлари ташкил этилмагани аниқланди. Оқибатда юк машиналари лой ва тупроқни кўчанинг 2–2,5 километрлик қисмига олиб чиққан.
Шунингдек, қурилиш ҳудудида чанг кўтарилишининг олдини олиш учун сув пуркаш қурилмалари ўрнатилмаган, ҳавони муҳофаза қилиш чора-тадбирлари ишлаб чиқилмаган. Давлат экологик экспертизаси хулосасида белгиланган талаблар ҳам бажарилмаган.
Бундан ташқари, ерости автотураргоҳи экспертизадан ўтган лойиҳада назарда тутилмагани, котлованлардан қазиб олинган 87 минг куб метрдан ортиқ тупроқ қаерга жойлаштирилгани бўйича ҳужжатлар тақдим этилмагани маълум бўлди.
Аниқланган қоидабузарликлар юзасидан Вазирлар Маҳкамасининг 202-сон қарорига асосан корхонага атроф-муҳитга етказилган зарар учун 1,23 миллиард сўмдан ортиқ компенсация тўлови ҳисобланди.
Корхонага аниқланган камчиликларни бартараф этиш, чанг кўтарилишининг олдини олиш, дарахт кўчатлари экиш ва бошқа экологик талабларга риоя қилиш бўйича кўрсатмалар берилди.
