Бу ҳақда Транспорт вазирлиги маълум қилди.
Қайд этилишича, бугунги кунда пойтахтдаги ер усти жамоат транспорти 169 та автобус йўналишида йўловчиларга хизмат кўрсатмоқда. Таъкидланишича, йилнинг барча фаслларида аҳоли учун қулай ва хавфсиз ташув хизматларини ташкил этиш соҳанинг устувор вазифаларидан ҳисобланади.
Шу муносабат билан Тошкент шаҳри автобус йўналишларида ташувчилар томонидан брутто-шартнома талаблари ва белгиланган сифат мезонларига риоя этилиши устидан назорат кучайтирилди.
Белгиланган талабларга мувофиқ, ташқи ҳаво ҳарорати +28 даражадан юқори бўлган ҳолларда автобус ва электробуслар салонида кондиционерлар ишлатилиши ҳамда ички ҳарорат +26 даража атрофида сақланиши шарт.
Транспорт вазирининг тегишли кўрсатмаси асосида Тошкент шаҳар транспорт ва йўл-транспорт инфратузилмасини ривожлантириш бош бошқармаси ҳамда «Тошшаҳартрансхизмат» АЖ раҳбарияти бошчилигидаги ишчи гуруҳлар автобус йўналишларида рейдлар ўтказиб, брутто-шартнома доирасидаги сифат талабларининг бажарилишини жойларда назорат қилмоқда.
