Халқ депутатлари Тошкент шаҳар Кенгаши жамоат транспортида йўл ҳақи тарифларини қайта кўриб чиқиш бўйича қарор лойиҳасини жамоатчилик муҳокамасига қўйди.

Лойиҳага кўра, 1 октябрдан қуйидаги тарифларни жорий этиш таклиф қилинмоқда:

  • автобус ёки метро учун бир марталик электрон тўлов — 1700 сўмдан 2500 сўмга;

  • нақд пулда тўлов — 3000 сўм миқдорида;

  • багаж ташиш ҳақи — 4000 сўм.

Барча тарифлар ҚҚС билан бирга кўрсатилган.

Транспорт вазирлиги маълум қилишича, доимий йўловчилар учун янги абонементлар ҳамда жамоат транспортининг бир туридан бошқасига ўтиш учун алоҳида тарифларни жорий этиш таклиф қилинмоқда.

Айни пайтда пойтахт жамоат транспорти ҳар куни қарийб 2,5 миллион йўловчига хизмат кўрсатмоқда. Сўнгги йилларда метро йўналишлари тармоғи кенгайтирилиб, ер усти йўловчи ташиш транспорти йўналишлари билан интеграция қилинди.

Амалга оширилган ишлар натижасида ҳаракат таркиби қарийб икки баробарга кенгайиб, автобуслар сони 1900 тага яқинлашди. Уларнинг ўртача қатнов оралиғи эса 30 дақиқадан 15 дақиқага қисқарди. Йўналишлар тармоғи янги турар жой массивлари ва пойтахтга туташ ҳудудларни қамраб олиш ҳисобига кенгаймоқда.

Шу билан бирга, ҳаракат таркибини харид қилишдан ташқари, транспорт воситаларининг ҳар куни йўналишга чиқиши ва техник соз ҳолатда бўлишини таъминлаш ҳам зарур. Бу билан боғлиқ харажатларга машинист, ҳайдовчи ва техник ходимларнинг иш ҳақи, ёқилғи ва электр энергияси, эҳтиёт қисмлар ва шиналар, техник хизмат кўрсатиш ва таъмирлаш, депо ҳамда қувватлантириш инфратузилмасини сақлаш, салонларни тозалаш, диспетчерлик, навигация ва электрон тўлов тизимларини таъминлаш киради.

Амалдаги тариф ушбу харажатларнинг фақат бир қисмини қопламоқда. Ташувларни молиялаштиришда асосий юк ҳамон давлат бюджети зиммасида қолмоқда.

Шу боис тарифларни эҳтимолий ўзгартириш ташувчиларга қўйиладиган аниқ талаблар билан биргаликда кўриб чиқилиши лозим. Улар қатновларнинг мунтазамлиги, белгиланган интервалларга риоя этиш, транспорт воситаларининг техник ҳолати ва тозалиги, йўловчилар хавфсизлиги, хизмат кўрсатиш маданияти ҳамда йўналишлар тармоғини янада кенгайтиришни қамраб олади.

Қайд этилишича, тарифларни ўзгартириш бўйича қарор лойиҳаси ҳозирча жамоатчилик муҳокамасида. Фуқаролар 19 сентябрга қадар ҳужжат билан танишиб, Норматив-ҳуқуқий ҳужжатлар лойиҳалари муҳокамаси портали орқали ўз таклиф ва мулоҳазаларини юборишлари мумкин.

Келиб тушган таклиф ва мулоҳазалар якуний қарорни тайёрлаш жараёнида кўриб чиқилади.