Янги тартиб пойтахтда транспорт оқимини самарали ташкил этиш, эрталабки ва кечки тирбандлик пайтларида йўллардаги юкламани камайтириш ҳамда таълим жараёнини мақбул ташкил этишга қаратилган.
Дарсларнинг эртароқ бошланиши талабалар ва профессор-ўқитувчиларга ҳаракатланиш вақтини оқилона режалаштириш, шунингдек, кун давомида ўқув жараёнини самарали ташкил этиш имконини беради.
Шу билан бирга, мазкур тартиб кундузги ва кечки таълим шаклида таҳсил олаётган талабалар учун ўқув кунини тўғри режалаштириш, машғулотлар ва бошқа ўқув фаолиятлари учун вақт имкониятларини кенгайтиришга хизмат қилиши кутилмоқда.
Янги ўқув йилига тайёргарлик жараёнида Тошкент шаҳридаги олий таълим ташкилотлари раҳбарлари, профессор-ўқитувчилар, педагоглар ва талабалардан ушбу тартибни инобатга олиш сўралди.
Таълим ташкилотларида ўқув машғулотларини белгиланган вақтда бошлаш, ўқув жараёнини тегишли тартибда ташкил этиш ҳамда талабалар учун зарур шарт-шароитларни яратиш бўйича чоралар кўрилади.
Эслатиб ўтамиз, мазкур тартиб фақат Тошкент шаҳрида жойлашган олий таълим ташкилотларининг биринчи сменасидаги ўқув машғулотларига тааллуқли, дейилади хабарда.
