Давлат хавфсизлик хизмати Чегара қўшинлари ва Тошкент вилояти бўйича бошқармаси ходимлари томонидан бошқа ҳуқуқни муҳофаза қилувчи органлар билан ҳамкорликда ўтказилган тадбирда «Тошкент – Фарғона» йўналишида ҳаракатланаётган «Tracker» русумли автомашина тўхтатилди.

Текширув давомида Фарғона шаҳрида яшовчи, муқаддам талончилик жинояти учун судланган шахс бошқарувидаги транспорт воситаси кўздан кечирилди. Автомобил салонида ҳайдовчи ўз истеъмоли учун сақлаб келган наркотик модда аниқланган.

Қўшимча текширувлар чоғида эса автомашина юкхонасидан жами 8 килограмм 913 грамм «гашиш» мусодара қилинди.

Дастлабки маълумотларга кўра, ушбу гиёҳвандлик моддаси қўшни давлатдан контрабанда йўли билан олиб кирилган бўлиб, гумонланувчи уни қабул қилиб олганидан сўнг доимий яшаш манзилига олиб кетаётган бўлган.

Мазкур ҳолат юзасидан жиноят иши қўзғатилган бўлиб, тергов ҳаракатлари давом эттирилмоқда.

ДХХ фуқароларни гиёҳвандлик воситалари савдоси билан боғлиқ ҳолатларга дуч келганда 1520 қисқа рақами орқали хабар беришга чақирди.