Мазкур ҳодиса юзасидан 15 ёшли гумонланувчи, унинг ота-онаси ва ҳужумда қўлланилган қурол эгаси бўлган бобоси қўлга олинди.
A Haberнинг хабар беришича, Туркия адлия вазири Акин Гюрлек терговга оид янги тафсилотларни маълум қилди.
Ҳодиса эрталаб Тургутлу туманидаги Инжи Узмез лицейи яқинида юз берди. Номаълум шахс ўқув муассасасига бораётган ўқувчиларга қарата тартибсиз равишда ўт очди.
Гумонланувчи ҳужумдан кўп ўтмай қўлга олинди. Уўша лицеёнинг 15 ёшли ўқувчиси бўлиб чиқди.
Вазирнинг сўзларига кўра, Тургутлу прокуратураси ҳодисадан сўнг дарҳол кенг қамровли тергов ишларини бошлаган. Тергов доирасида ҳужум уюштирган шахсдан ташқари унинг онаси, отаси ва бобоси ҳам қўлга олинди. Терговчилар ҳужумда фойдаланилган қурол ўсмирнинг бобосига тегишли эканлигини аниқлашди.
Ҳуқуқ-тартибот органлари вояга етмаган шахс қуролни қандай қўлга киритгани, у қандай шароитда сақлангани ҳамда ота-она фарзандни парваришлаш ва назорат қилиш бўйича ўз мажбуриятларини тегишли тарзда бажарган-бажармаганини текширмоқда.
Шунингдек, расмийлар ўсмир ҳужумдан олдин тенгдошлари томонидан тазйиққа учраган бўлиши мумкинлиги ҳақидаги маълумотларни ҳам ўрганмоқда.
Туркия Миллий таълим вазирлиги ушбу ўрта мактабда дарслар 22 сентябрь куни тўхтатилганини эълон қилди. Ўқувчилар, ўқитувчилар ва ота-оналарга ёрдам кўрсатиш учун психологик, ижтимоий қўллаб-қувватлаш гуруҳлари жалб этилди, деб хабар берди report.az.
