Ҳисобот даврида коррупцияга қарши курашиш чора-тадбирлари дастури ва тасдиқланган режа асосида банкнинг бош офиси, 15 та ҳудудий банк хизматлари маркази ҳамда 46 та банк хизматлари офисида белгиланган тадбирлар ижроси таъминланган.
Банкнинг очиқлик ва шаффофлик борасидаги фаолияти ҳам юқори баҳоланган. 2025 йилги «Очиқлик индекси» натижаларига кўра, Turonbank 90 балл тўплаб, вазирлик, идора ва ташкилотлар орасида 11-ўринни, тижорат банклари орасида эса биринчи ўринни эгаллаган.
Бундан ташқари, Ўзбекистон Республикаси Президентининг 2022 йил 12 январдаги ПҚ-81-сон қарори талаблари асосида ўтказилган якуний рейтинг баҳолаш натижаларига кўра, банкнинг коррупцияга қарши курашиш ишлари самарадорлиги 100 баллдан 81 балл — «яхши» деб баҳоланган.
Turonbankнинг коррупцияга қарши бошқарув тизими халқаро даражада ҳам баҳоланган. Ташқи аудит натижаларига кўра, банк ISO 37001 халқаро стандартига мувофиқлик сертификатини олган.
Мазкур стандарт коррупциявий хавф-хатарларни аниқлаш, баҳолаш ва камайтириш, манфаатлар тўқнашувининг олдини олиш ҳамда коррупцияга қарши самарали бошқарув тизимини шакллантиришга қаратилган.
25 та функцияда коррупциявий хавф аниқланган
Банк тизимида коррупциявий хавф-хатарларни аниқлаш ва уларни минималлаштиришга ҳам алоҳида эътибор қаратилмоқда.
Бош офис, барча банк хизматлари марказлари ҳамда банк хизматлари офислари кесимида коррупциявий хавф-хатарлар харитаси ишлаб чиқилган.
Ўтказилган баҳолаш натижасида 25 та функцияда коррупциявий хавфлар аниқланган. Юқори даражадаги қолдиқ коррупциявий хавф-хатарлар тўлиқ бартараф этилган.
Шунингдек, банк ходимларининг манфаатлар тўқнашуви бўйича декларациялари таҳлил қилинган. Жумладан, Кузатув кенгаши, бошқарув аъзолари, бош офиснинг 26 та департамент ва мустақил бошқармалари, 15 та банк хизматлари маркази ҳамда 46 та банк хизматлари офисидаги жами 1361 нафар раҳбар ва ходимнинг декларациялари ўрганилган.
Харидларда манфаатлар тўқнашуви ўрганилмоқда
Банк харидларида шаффофлик ва соғлом рақобатни таъминлаш мақсадида контрагентлар томонидан тақдим этилган маълумотларни мониторинг қилиш йўлга қўйилган.
Бунда манфаатлар тўқнашуви, контрагентларнинг банк ходимлари билан аффилланганлиги ва хариднинг бошқа иштирокчилари билан алоқадорлиги каби ҳолатлар махсус ахборот манбалари орқали ўрганилмоқда.
Коррупцияга қарши бошқарув тизимини янада такомиллаштириш мақсадида коррупциявий хавф-хатарларга кўпроқ мойил бўлган банк ходимлари ISO 37001 халқаро стандарти талаблари асосида махсус ўқитилган ва уларга тегишли сертификатлар берилган.
Шунингдек, банк бош офиси ҳамда банк хизматлари марказлари ходимлари учун мутасадди ташкилотлар билан ҳамкорликда семинар-тренинглар ва давра суҳбатлари мунтазам ташкил этилмоқда.
Коррупция ҳақида хабар бериш каналлари ишламоқда
Банкда коррупциявий хавф-хатарларнинг олдини олиш ва коррупция билан боғлиқ ҳолатлар ҳақида хабар бериш учун ишонч телефони, Telegram-бот, электрон почта, веб-сайтлар ва бошқа алоқа каналлари фаолияти йўлга қўйилган.
Ҳисобот даврида мазкур каналлар орқали 2 та мурожаат келиб тушган. Улар белгиланган тартибда кўриб чиқилиб, мурожаатларга жавоб хатлари юборилган.
Банк маълумотига кўра, коррупцияга қарши курашиш йўналишида амалга оширилаётган тизимли чора-тадбирлар Turonbank фаолиятида очиқлик, шаффофлик, ҳисобдорлик ва ҳалоллик тамойилларини янада мустаҳкамлашга қаратилган.
Шунингдек, коррупцияга қарши курашиш бўйича амалга оширилаётган ишлар ҳақида жамоатчиликни мунтазам хабардор қилиш мақсадида банкнинг расмий веб-сайтлари, электрон почта, ишонч телефони ва Telegram-бот каби алоқа каналлари фаолияти давом эттирилмоқда.
Реклама
