Давлат хавфсизлик хизматининг Тошкент вилояти бўйича бошқармаси ҳамда вилоят Ички ишлар бош бошқармаси ходимлари ҳамкорлигида Бўстонлиқ туманида ўтказилган тезкор тадбирда Андижон вилояти Марҳамат туманида яшовчи, 2000 й.т. шахс ўзининг бошқарувидаги “Кобалт” русумли автотранспорт воситасида тадбир иштирокчиларининг қонуний талабига бўйсунмасдан қочишга уриниб, автомашина салонида бўлган 2 дона ўрамдаги шубҳали моддаларни улоқтириб юборади.
Сўнгра, транспорт воситаси тўхтатилиб, унинг салонидан қўшимча яна 2 дона ҳамда мазкур шахс қабул қилиб олиши керак бўлган геолокациядан эса 1 дона ўрамдаги шубҳали моддалар олинди.
Ўтказилган тезкор тадбир давомида аниқланган моддалар “гашиш” гиёҳвандлик воситаси ҳисобланиб, уларнинг жами оғирлиги 5 кг.ни ташкил этади.
Давлат хавфсизлик хизматининг Тошкент шаҳар бўйича бошқармаси ҳамда Ички ишлар органлари ҳамкорлигида Чилонзор туманида ўтказилган тезкор тадбирда катта миқдордаги синтетик наркотиклар фош этилди.
2005 й.т. хорижий давлат фуқароси тўхтатилиб текширилганда, унинг ёнида зип-пакетга солинган кукунсимон модда борлиги маълум бўлди ҳамда у вақтинча яшаётган хонадон ҳам холислар иштирокида кўздан кечирилди.
Натижада, турли озиқ-овқат маҳсулотлари номи остида қадоқланган пакетлар ичида 4 кг 133 гр “3-хлорометкатинон”, 403 гр “Амфетамин”, 720 гр “МДМА” ва 20 гр “кокаин” гиёҳвандлик воситалари борлиги аниқланиб, процессуал тартибда расмийлаштириб олинди.
Давлат хавфсизлик хизматининг Наманган вилояти бўйича бошқармаси ва Чегара қўшинлари ҳамда Божхона органлари ҳамкорлигида Учқўрғон туманидаги чегара-божхона постида ўтказилган тезкор тадбирда қўшни давлатдан мамлакатимизга кириб келган – Чортоқ туманида яшовчи, 2000 й.т. шахс бошқарувидаги “Ласетти” русумли транспорт воситаси текширилди.
Натижада унинг ёқилғи баки ичига 2 кг 513 гр “Альфа-ПВП” синтетик гиёҳвандлик воситаси яширилганлиги аниқланиб, ашёвий далил сифатида расмийлаштириб олинди.
Шунингдек, мазкур шахс билан чегара-божхона постигача бирга келиб, постни пиёда кесиб ўтиб, республикамиз ҳудудида уни кутиб турган 2005 й.т. чортоқлик шериги ҳам ушланди.
