Тошкент туманлараро иқтисодий суди қарори билан «Inter Express Service» МЧЖнинг мазкур ерга бўлган ҳуқуқи бекор қилинди.

Учтепа тумани Қуйи Дархон маҳалласи Тақачи мавзесидаги 42–44-уйларда яшовчи фуқаролар 2014–2015 йилларда ўз маблағлари ҳисобидан 2–3-уйлар оралиғидаги қаровсиз бўш ерда ҳашар йўли билан футбол ва болалар майдончасини барпо этган.

Шундан кейин бир неча йил давомида маҳаллада яшовчи аҳоли ва уларнинг фарзандлари ушбу майдонлардан фойдаланиб келган.

Бироқ 2026 йил март ойида ўзини «Inter Express Service» МЧЖ вакиллари сифатида таништирган шахслар маҳаллага бир неча бор келиб, мазкур ҳудудда қурилиш ишлари режалаштирилаётганини маълум қилган.

Бундан норози бўлган аҳоли 16 март куни Президент Халқ қабулхонасига мурожаат қилган.

Мурожаатни ўрганган Учтепа тумани прокуратураси жавобида мазкур ер 2018 йилда Учтепа тумани ҳокимининг 946-сонли қарори асосида «Inter Express Service» МЧЖга савдо ва маиший хизмат кўрсатиш шохобчаси қуриш учун ажратилгани маълум қилинган.

Шунингдек, ер участкаси 2025 йил 25 февралда Давлат кадастрлари палатаси томонидан давлат рўйхатидан ўтказилиб, МЧЖ номига расмийлаштирилгани қайд этилган.

Бироқ Президент Халқ қабулхонаси ўрганиш жараёнида масалага тўлиқ ҳуқуқий баҳо берилмагани ва бир қатор ҳолатлар етарлича текширилмаганини аниқлаган.

Жумладан, футбол ва болалар майдончаси мавжуд бўлган ҳудуд қандай асосларга кўра бўш ер сифатида баҳоланиб, тадбиркорлик субъектига ажратилгани, шунингдек, ер 2018 йилда ажратилган бўлса-да, нега шу кунга қадар мақсадли фойдаланилмагани масалаларига ойдинлик киритилмаган.

Шу сабабли Президент Халқ қабулхонаси 17 июнь куни мурожаатни қайта ижрога қайтарган.

Якунда Тошкент туманлараро иқтисодий суди мазкур ер майдони бўйича қарор қабул қилди.

Унга кўра, «Inter Express Service» МЧЖнинг ушбу ер майдонига бўлган ҳуқуқи бекор қилинди.

Шу тариқа маҳалла аҳолиси бир неча йил давомида фойдаланиб келган футбол ва болалар майдончаси жойлашган ҳудуднинг тақдирига оид низода аҳоли манфаати инобатга олинди.