Бунинг учун Қурилиш ва уй-жой коммунал хўжалиги вазирлиги тасарруфидаги dshk.shaffofqurilish.uz геопорталидан фойдаланиш мумкин. Тизим орқали қурилиш объектларининг ҳолати, уларнинг қонунийлиги ҳамда шаҳарсозлик ҳужжатларига оид маълумотларни текшириш имкони бор, дея хабар беради Қурилиш ва уй-жой коммунал хўжалиги вазирлиги ахборот хизмати.
Хабарда айтилишича, порталдаги махсус реестрда қонунбузарлик аниқланган объектларнинг манзили, майдони ва фотосуратлари жойлаштирилган.
Харитадаги рангли белгилар орқали объектнинг ҳолатини ҳам аниқлаш мумкин. Хусусан, кўк ранг қурилиш қонуний равишда давом этаётганини, қизил ранг қурилиш ишлари тўхтатилганини, қора ранг эса қурилиш бекор қилинганини англатади.
Агар қурилаётган объект харитада умуман акс этмаган бўлса, бу унинг расмий рўйхатдан ўтмаганини англатиши мумкин.
Шунингдек, тизим орқали объект давлат назоратида эканлиги, яқин вақтда бузилиш ёки реновация режасига киритилган-киритилмаганини ҳам олдиндан аниқлаш мумкин.
Мутахассислар фуқароларга уй-жой ёки бошқа кўчмас мулкка маблағ киритишдан олдин объект ҳақидаги маълумотларни мазкур база орқали текшириб олишни тавсия этмоқда.
