Ўзбекистон Республикаси Вазирлар Маҳкамасининг 2024 йил 12 октябрдаги 668-сон қарорига мувофиқ, “Умра” тадбирларини ташкил этиш ва ўтказиш фаолияти махсус лицензия асосида амалга оширилади. Мазкур тартиб зиёратчиларнинг ҳуқуқ ва қонуний манфаатларини ҳимоя қилиш, уларнинг хавфсизлигини таъминлаш ҳамда сифатли хизматлардан фойдаланишини кафолатлашга қаратилган. Аммо, белгиланган тартибга қарамай, айрим шахслар томонидан қонунни четлаб ўтган ҳолда, “Умра” зиёратини ташкил этишга уриниш ҳолатлари қайд этилмоқда.
Мамлакатимиз миқёсида ўтказилаётган “Хавфсиз ва соғлом юрт” тезкор-профилактик тадбирлари доирасида ана шундай қонунбузилиш ҳолатларига чек қўйилди.
Хусусан, Самарқанд шаҳрида ички туризм соҳасида фаолият юритувчи сайёҳлик фирмаси ишчиси тегишли лицензия ва рухсатномага эга бўлмаган ҳолда, 3 нафар фуқарони “Умра” зиёратига юборишини айтиб, эвазига ҳар бири учун 1200 АҚШ долларидан, жами 3600 АҚШ доллари талаб қилган.ДХХ Самарқанд вилояти бўйича бошқармаси ҳамда вилоят ИИБ ходимлари ҳамкорлигида ўтказилган тезкор тадбирда мазкур шахс 3600 АҚШ dollarini олган вақтида ашёвий далиллар билан ушланди.
Худди шундай ҳолат Гулистон шаҳрида ҳам кузатилди. Унда 1974 й.т. шахс Тошкент шаҳрида фаолият юритувчи турфирма орқали 3 нафар фуқарони муқаддас диний амалларни бажариш учун Саудия Арабистонига ноқонуний юбориш эвазига жами 3300 АҚШ доллари ва 1,2 млн сўм олган вақтида ДХХ Сирдарё вилояти бўйича бошқармаси ҳамда ИЖҚКДнинг вилоят бошқармаси ходимлари томонидан ушланди.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
