Қайд этилишича, вақтинчалик низом 2026 йил 30 сентябрда 3949-сон билан рўйхатга олинган.
Унга кўра, йўл оператори пулли йўлдан фойдаланиш бошланишидан олдин тарифлар, тўлов усуллари ва муқобил бепул йўл ҳақидаги маълумотларни эълон қилиши шарт.
Пулли йўлдан фойдаланиш оператор ва фойдаланувчи ўртасида тузиладиган оммавий шартнома асосида амалга оширилади. Тўловларни электрон шахсий ҳисоб, тўлов пункти ёки кечиктирилган тўлов усули орқали амалга ошириш мумкин.
Йўлдан фойдаланиш нархи транспорт воситаси тоифасига қараб белгиланади. Бунда оператор тарифларни Транспорт вазирлиги белгилаган энг юқори миқдорлардан оширмаган ҳолда мустақил белгилайди.
Шунингдек, фойдаланувчилар тўловлар тарихини ва мавжуд қарздорликни текшириш, нотўғри ҳисобланган тўловларни қайта ҳисоблашни талаб қилиш ҳуқуқига эга. Операторнинг ҳаракатлари устидан Автомобиль йўллари қўмитасига ёки судга шикоят қилиш ҳам мумкин.
Тўсиқсиз тўлов тизимида кечиктирилган тўлов қўлланилганда, фойдаланувчи хабарнома юборилган кундан бошлаб беш иш куни ичида тўловни амалга ошириши лозим.
Қарздорлик юзасидан шикоят келиб тушган тақдирда, оператор беш иш куни ичида маълумотларни қайта текширади. Шикоят асосли деб топилса, қарздорлик бекор қилинади ёки тўлов қайта ҳисобланади.
Низомга мувофиқ, оператор йўлни соз ҳолатда сақлаши, авариялар ва техник носозликлар юзага келганда ёрдам кўрсатишни ташкил этиши, шунингдек, йўлдаги носозликлар туфайли транспорт воситаларига етказилган зарарни белгиланган тартибда қоплаши шарт.
Ҳужжат расмий эълон қилинган кундан эътиборан кучга киради ва пулли автомобиль йўлларидан фойдаланиш тартибини белгиловчи Вазирлар Маҳкамаси қарори кучга киргунига қадар амал қилади.
