Бу ҳақда бугун Божхона қўмитаси ва UzIMEI маркази вакиллари иштирокида ўтказилган матбуот анжуманида маълум қилинди.
Қайд этилишича, IMEI идентификаторларини текширишда шубҳали ҳолатлар юзага келганда, божхона ходимларига амалий ёрдам бериш учун UzIMEI мутахассисларининг Тошкент халқаро аэропортида доимий фаолият юритиши йўлга қўйилди.
Шунингдек, аввал олиб қўйилган бир неча юзта мобил қурилмани эгаларига қайтариш ишлари бошланган.
Матбуот анжуманида айрим шахслар божсиз олиб кириш меъёрларини четлаб ўтиш учун IMEI кодларини сохталаштириш ва бошқа қурилмаларга тегишли идентификаторлардан фойдаланиш каби қонунбузилишларга қўл ураётгани айтилди.
Маълум қилинишича, 2026 йилнинг 10 ойида Ўзбекистонга расман 4,1 миллион дона мобил қурилма олиб кирилган. Бу ўтган йилнинг мос даврига нисбатан 1 миллион донага кўп.
